梁慧恩舞住結婚即晚造人
「RoadShow女主持」梁慧恩（Viann）與林忠澤昨晚在君悅酒店筵開四十席註冊結婚，穿婚紗、戴鑽戒的Viann說：「今日好多感動位，有位80幾歲親戚由內蒙嚟，老公朝早斟茶都眼濕濕。婚宴上兩家家長會彈琴、吹笛、唱歌，我同老公跳舞。」林忠澤則大讚老婆：「我人生最開心係今日，多謝老婆同上主，我會照顧Viann一生一世，錫埋佢家人、朋友。（老婆值幾分？）唔應該畀分，老婆冇得比！（幾時造人？）今晚！順其自然，仔女冇所謂。」熱愛環保的Viann把婚宴餐單剔除魚翅，身體力行推動環保。
而新郎堂哥、曾與廖碧兒及莊思敏傳緋聞的林忠豪說：「細佬同堂弟都爬我頭，長輩、平輩都催我結婚，我好尷尬，但唔擔心做剩男。（同落選港姐傳緋聞？）朋友啫！（送乜賀禮？）利是同不設上限嘅禮物，希望佢哋快啲生BB。」
換上婚紗及禮服的Viann與林忠澤情深一吻。
Viann與林忠澤向長輩斟茶時感動得眼濕濕。
新人以陳皮及龜苓膏糖回禮，甚具特色。