高鈞賢背翠翠髀餓女任猜

首屆香港先生冠軍高鈞賢，前晚背着「女友」葉翠翠到中環夜店消遣，遇不少餓女狂「嗲」，甚至主動坐他大髀兼喪猜枚！兩杯落肚的他飲到「斷片」收場，連警察查牌及大髀失守也懵然不知！

快將28歲的前港男冠軍高鈞賢（Matthew），入行以來女人緣頗強，除了與港姐冠軍葉翠翠及徐子珊傳緋聞外，還承認曾與日本女星Haruka拍拖但已分手。幕前的Matthew形象乖巧，演戲七年來多演正派，乖仔形象深入民心，但原來私下喜歡夜蒲，前晚更被拍得背「女友」翠翠而任餓女坐大髀！

前晚，Matthew背着翠翠與一大班男、女友人到中環夜蒲，他到達夜店後甚受現場女孩歡迎，同場還有去年香港先生冠軍兼應屆港姐冠軍朱晨麗男友李晉強。起初，Matthew玩得頗斯文，但當喪飲酒及香檳後，兩杯落肚即「乖仔也瘋狂」High到爆，期間更有餓女主動坐他大髀！雖然該女孩無比亢奮，但他並無「手多多」，反而「硬晒軚」。

完事冇印象

直至凌晨2時半，突然有警察到場查牌，令Matthew頗愕然，但仍繼續與女友人隊酒猜枚，猜輸便被罰「吹喇叭」。他還做鬼臉扮可憐冧女，不少餓女發功狂「嗲」他！玩了一輪後，Matthew發現仍未查完牌，改為埋首喪玩手機。

事後，Matthew接受本報電話訪問時表示，前晚是出席朋友生日會：「當中有個好朋友生日，但唔係女朋友，周圍啲人好熱情。」他亦坦承喝了很多酒及香檳，問到有女孩坐大髀，他竟反問：「吓？我真係冇乜印象，個女仔係點樣？咁我有冇攬住佢？雖然我唔知（畀女仔坐大髀），但禮貌上都唔會推開佢。（怕翠翠嬲？）我哋係朋友，一直冇認拍拖。我去嘅係正常Party，朋友交往唔需要介意。（查牌？）唔知！（李晉強在場？）係呀！後來喺現場遇到佢。」

記者其後致電李晉強，他亦「夾口供」說：「我哋有共同朋友生日，落去同壽星女講聲生日快樂。（高鈞賢畀女圍？）我見到佢，啲女仔係圍佢，但唔係圍我！我唔識佢哋（指班女仔），只係飲咗兩杯香檳。」問到會否擔心激嬲女友朱晨麗而不敢多喝酒？他竟說：「佢唔係我女友，我哋係朋友，依家好少聯絡，大家好忙。」