拖仔食甜品 張舒雅唔等得黑面撇

富貴過氣港姐張舒雅日前與男友及友人一心來個飯後甜品，幫襯藝人谷祖琳的甜品店，不料去到門口才知全場爆滿，張舒雅等了十多分鐘已不耐煩，面黑黑拉隊走人。

現年26歲、家境富裕的「最Hea港姐」張舒雅，日前相約科技公司老闆男友Samuel及友人於天后食日本菜，工作態度向來不被外界認同的她，對朋友卻相當有「義氣」，當晚11時許，於飯局中途應女友人要求，齊齊到後巷煲煙，張舒雅焗住邊吸二手煙邊陪傾偈，隨後二人折返店內食埋下半場。

向男友撒嬌

張舒雅一行七人食完埋單，先後步出食店，無綫藝員吳幸美原來亦是座上客，身邊更黐實一名疑似男友的大隻男，眾人於店外商討轉場，再結伴幫襯谷祖琳開設的甜品店。沿途各人有傾有講，情緒相當高漲，張舒雅時而摸頭時而插袋，動作多多，與友人雞啄唔斷。

由於正值周末，甜品店全場爆滿，張舒雅一行人與其他食客一樣要在店外排隊等位，貴為千金小姐的她，等了一會便開始扁嘴，繼而黑口黑面地向男友撒嬌。十多分鐘過去，她已完全不耐煩，嚷着要離開。眼見大小姐變臉，同行友人也不好意思堅持繼續等，最後齊齊散水，Samuel為安撫女友，匆匆往取車，再送她返歸。