GaGa港騷開鑼海關問話贈興

百變天后Lady GaGa昨晚在港開騷時，自爆被海關踩上酒店房問話！日前她在Twitter衰多口表示能在香港買到A貨手袋，豈料引來海關查問，雖然她已解釋只是笑話一則！

經過連日追訪Lady GaGa的賽前熱身，GaGa騷終進入戲肉！在一片黃牛黨恐慌性拋售門票及宗教團體反對聲中，GaGa首場《The Born This Way Ball》世界巡迴演唱會昨晚在亞洲國際博覽館開鑼，但她卻自爆被海關問話贈興！日前在Twitter揚言喜愛香港，因可在同一條街買A貨手袋及做運動的她，在個唱中段自爆因而被海關踩上酒店房問話，了解她在何處買A貨手袋，她輕鬆地表示已跟海關解釋純屬笑話一則，而海關方面亦承認曾聯絡GaGa跟進。

改歌詞冧港迷

不過，此事沒有影響GaGa的心情！昨晚的個唱於8時半開始，比原定時間遲了近1小時，當白布拉開後，台下「小怪物」狂揼腳迎接「怪物女王」，千呼萬喚下，全副武裝的GaGa騎着獨角獸由中世紀軍隊打扮的舞蹈員護送下登場，並以歌曲《Highway Unicorn（Road to Love）》揭開序幕，全場歡呼聲四起！其後，她分別以電影《異形》打扮、金色晚禮服及裸色戰衣等示人，做齊擘髀及飄浮等高難度動作，絕不欺場！當她唱到《Bad Romance》時，更即興改歌詞做「Rah Rah Hong Kong」冧港迷！

粉絲Tee磨下身

向來言行大膽的GaGa，不乏自摸大髀及扮咀女舞蹈員等動作，有粉絲送上印有「I Love Hong Kong」字樣的Tee，她即時穿上，然後又脫下放在下身磨！不過，當她自彈自唱時又顯露感性一面，提到有人罵她是魔鬼，她說：「如果我真係魔鬼，我願意同粉絲一齊落地獄！」此外，開騷前場外發生小插曲，企位粉絲爭先恐後入場時場面混亂，有人與保安口角，亦有人在場內感不適。

對於GaGa被海關查問一事，黃國桐律師說：「如果海關透過佢講嘅地址搵到冒牌手袋，咁佢就犯咗『協助他人冒犯商品說明條例』，同『冒犯商品說明條例』一樣罰咁重，都係刑事罪行，會直接罰坐監或緩刑，刑期視乎起到幾多冒牌貨而定。」雖然GaGa揚言只是「講吓笑」，但不可當洗脫罪名的理由，他說：「可以係求情理由，但唔可以令佢冇罪。」