天明定情袋被偷家蔚勁心痛

今年3月才結婚的藝員洪天明及周家蔚，村屋愛巢前日慘遭賊匪撬窗入屋爆格，偷走約值十萬元財物，當中包括天明送給家蔚的價值萬多元的定情手袋，令兩口子無比心痛，難怪要漏夜諗防盜方法，保衞家園！

新婚不久的洪天明及周家蔚，其位於將軍澳馬游塘村的愛巢前日遭爆格！天明前晚約9時許返家時發現寓所被人大肆搜掠，家中非常凌亂，窗戶亦有被人撬過的痕迹，損失金器、首飾及名貴手袋等約值十萬元物品，相當慘情！

痛失結婚禮物

天明昨日表示，家中未有極貴重物品被偷走，但有紀念價值的物品卻未能幸免，令他十分傷心︰「尋日下晝3點至9點屋企冇人，當我9點幾返屋企時就發現畀人爆格！其實損失嘅財物唔多，因為貴重嘢都唔會擺喺屋企，結婚時嘅龍鳳鈪同金器放咗喺保險箱，唔見咗係之前玩遊戲贏嘅手錶，過時過節TVB送嘅生肖公仔等等囉！」

婚戒愛犬幸免

雖然錢財是身外物，但其中兩樣具紀念價值的物品難逃賊人魔掌，令天明最為心痛，他無奈地說︰「第一份送畀家蔚嘅Chanel手袋唔見咗，個袋喺拉斯維加斯買，成萬幾蚊，佢都唔捨得用，所以先放喺屋企！真係好心痛，好有紀念價值o架！」而弟弟送的結婚禮物亦成為賊人的獵物，令天明大嘆無奈又痛心，他說︰「我結婚嗰時，細佬送畀我嘅金器擺設，因為太大放唔到入保險箱，所以放喺屋企，價值5位數……不過都慶幸當時冇人喺屋企，如果人有損傷就唔好！」

另一邊廂，家蔚昨日接受訪問時則表示，天明送給她的定情Chanel手袋及自己買的同牌子手袋同樣不翼而飛，令她非常心痛，幸好婚戒安然無恙，她慨嘆︰「好好彩結婚同訂婚戒指我都一直戴喺手，冇唔見到！而且我哋養嘅5隻迷你貴婦狗都放咗喺媽咪嗰度，如果佢哋喺屋企，驚賊人唔知點對佢哋囉！」

成晚冇覺好瞓

對於遭賊人光顧，家蔚驚到「冇覺好瞓」，留下陰影，她說：「屋企畀人撬窗入屋，除咗窗同窗花畀人撬過，衣帽間都摷過晒！兩公婆尋晚都瞓得唔好，覺得好不安，天明成晚諗點搞防盜，我就嚇一嚇囉！」

警察公共關係科昨日證實於前晚9時許接獲馬游塘村洪姓男子報案，現列作爆竊案處理，暫時未有人被捕。

失竊清單

物件價值

Chanel銀灰色袋 萬多元

Chanel黑色漆皮袋 萬多元

首飾 2萬多元

巨型金器擺設 約3萬元

手錶多隻 萬多元

足金生肖擺設多個 數千元