黃耀明焗見輔導 初戀打柴

黃耀明公開承認是「Gay佬」，獲全城激讚，前晚他自爆讀初中時曾暗戀異性戀的男同學數年，要向輔導員求助，惜未得到支持，令初戀戀火一瞬即逝。

自「出櫃」後，明哥一直得到支持，前晚他接受電台同志節目訪問，再次剖白「斷背情」。他透露初戀發生在中三，當年暗戀了一位感情要好的男同學：「嗰時心情好複雜，佢唔係Gay嘅，但我又唔知自己係咪Gay，有次我同佢傾咗幾個鐘頭電話，終於同佢講『我鍾意你』，因為我哋係教徒，就話不如搵輔導員傾吓偈，咁就單方面撲熄咗（戀火）。」明哥記得輔導員指他長大就不會有同性戀的「錯覺」，自此他亦不敢再跟男同學重提此事，明白有些事只能埋藏心底。

阿媽喪喊

明哥說起1990年時，有感已覓得可長遠發展的穩定伴侶，於是鼓起勇氣向母親表明性取向，希望得到家人接納，可惜事與願違：「我估媽咪唔係完全唔知，但親口同佢講咗之後，媽咪好震驚、好唔開心，大家都大喊咗一場，我同佢講唔好以為係自己或者我嘅錯。」

另外，明哥希望傳媒手下留情，不要騷擾他的親友及伴侶，並希望為同性戀者謀福利。他有感現今社會對同性戀者存在歧視，例如同性伴侶未必認同為彼此的遺產受益人。問到可有訂立遺囑保障伴侶？他冧爆說：「未到嗰個階段，都係啱啱識。」