鄭融睇衫值回票價 李彩華最Like浴缸自摸
曾到澳門看過GaGa演出的鄭融表示，對今次GaGa港騷很期待：「GaGa喺韓國站着黑色魚尾裙高衩嗰Part我好欣賞，其實只係睇佢啲衫已經值回票價，就算話佢自摸、露股嗰啲場面，香港好多歌手都會咁做，所以GaGa嘅性感大膽程度可以接受！」另外，身在橫店拍劇抽空返港睇騷的李彩華說：「GaGa戴住自由神像頭飾喺浴缸自摸呢部分，好有意義，因為自由神像係代表美國。」鍾舒漫則說：「想睇佢自彈自唱，佢彈琴好震撼，踩喺琴上彈，好有趣！」
至於王賢誌則期待GaGa在騷中盡訴心中情：「佢上次紐約個騷，講咗好多自己點捱嘅經歷，好有啟發同鼓勵性！」而內地影星張馨予和GaGa同一天生日，可惜因工作而未能來港看騷，她說：「我相信她所有部分都好看，欣賞她對音樂及工作的瘋狂執着。」
鄭融和李彩華對GaGa騷很期待。（資料圖片）
