吳嘉龍 Ana R. Go Home

吳嘉龍十年，鎅女無數？Ana R.十年，年年畀仔撇？同是混血人，來港大展拳腳，得到得竟是大堆感情壞帳！然而身處國際文化大熔爐，感受最深非盛男盛女間的曖昧，而是身份問題，究竟我是何許人？

關於吳嘉龍（Carl），我們認知的他是一個大Playboy，鎅女無數，年食三千，男人之虎也！關於他的其他？ABC囉！老竇是搞笑好叻的演員吳燿漢，還有甚麼特別？其實連Carl本人也不知道！

溝女百發五中

六呎身形，一張混血臉孔，Carl鎅女先天條件卓越，難道有栽不下的囡囡？這是一個誤解，Carl來港十年，頭八年蒲到五勞七傷，但得到手的，十隻手指數得晒，他說：「我不嬲都鍾意做開心人，覺得夜蒲開心，所以我就去蒲，香港去玩好正常，不過唔係晚晚落老蘭，就算落去都唔只淨係為識女仔，更重要係夜蒲感覺好特別。」

Carl續說：「我溝女當然衰過好多次，一定唔係百發百中，百發五中都已經好好！我以前唔識追女仔，唔識請佢哋飲嘢同攞電話，其實我個人真係好怕醜！可能依家會好啲，因為香港女仔依家會好Aggressive（進取）。」

畢竟人已三張幾，Carl不再是一個酒筲箕，沉澱的性格令他對鎅女態度有新的詮釋，就是從以前的被動變得更加被動，他說：「老喇！真係好老！再冇咁嘅能量，我依家唔會特登追女仔，而係等女仔追我，效果好似仲好，依家去玩都唔會去啲咁嘈嘅地方，淨係想要靚紅酒、寧靜同輕鬆！」

精裝追女仔神話破滅，Carl卻是愈來愈愛香港，因為他找到自己的身份，一個自我的認知，他說：「爸爸係香港人，媽媽係英國人，我喺香港出世，英國長大，一直以嚟都有問自己究竟係邊度人。英國人一方面接受你，但唔知係咪我有一張中國人面孔，另一方面佢哋總會諗計排擠你！早前我返過倫敦，嗰度多咗好多新嘅餐廳、藝術館同新建築，咁樣令我覺得更加陌生，依家我同英國人真係溝通唔到！唔知點解呢！」

有間屋仔揸手

自十年前回歸香港，Change已發生在Carl身上，他說：「香港好歡迎我，自己都估唔到有咁多Job接，呢個係一個充滿挑戰同步伐好快嘅城市，嚟十年，好似做咗廿年嘢咁，個腦要不停運作，壓力大到不得了！但喺呢度，我搵到滿足感同歸屬感，知道香港先係我屋企，係我Mother Country！」

問題又來了，香港的住屋問題極之嚴重，400萬元的蚊型單位竟然是窮人恩物，Carl選擇做一個香港人，到底他是窮人定有錢人？Carl說：「真係好癲！400萬樓都係窮人救星，世界經濟又唔係好，真係反智！好幸運，我依家有自己嘅物業，係好細，但已經好過好多人！」好好，有屋仔，Carl只差一個老婆仔，有了老婆仔，便可明正言順落葉歸根！

後記：茶餐廳等女鎅！

三年冇見，小記跟Carl到茶餐廳敍舊，只見一個甜美的Waitress，小記叫Carl表演鎅女，他說：「唔好喇！我只識畀女鎅！」一句甜美聲音：「奶茶定咖啡？」Carl Order：「我要凍鴛鴦！唔該！」Carl真的所言非虛！

不少混血模來港發展，只為事業上的拚搏，但對名模Ana R.來說，香港不是中途站，而是第一個地方稱之為「家」。童年時的她經常搬屋，對周邊環境沒有太大歸屬感，在街上遇上光怪陸離的人，難怪她成為傳媒爭相追訪的對象！但她仍認為香港是世上最安全的地方， 她說：「我明白被追訪係我工作嘅其中一個條件，但係我喺度住咗十年，呢度係第一個地方叫『Home』﹗」

超市被聞頭髮

經常被影到夜蒲蘭桂坊的Ana，少不免被人誤會為蒲精，怕攰的她直言少夜蒲：「冇蒲吧！通常只係食吓飯、飲嘢！平時一個禮拜去一次，但次次咁蹺都被人影到！我冇特登去識人，次次都係一班人一齊食飯！」雖然她近年感情不太如意，難免被認為出擊找新對象，但她強調飯腳只是朋友，夜蒲鎅仔純粹外界推測。對於日前被拍到與師妹Jessica C.（JC）孖住夜蒲，她解釋：「我上次畀人影到同JC一齊飲嘢，其實上次係咁啱被人影到，咁啱同朋友食飯，只係順便叫埋JC！」

俗語話：「烏蠅摟蜜糖」Ana走在街上自不然得到途人的注目禮，她自言自幼經常遇上不可思議的事，最驚險是遇上跟蹤狂，她娓娓道來：「有一次喺超級市場，有個男人突然捉住我啲頭髮，講咗句『我好想聞你啲頭髮！』嚇到我尖叫、拔足狂奔！」身形高挑的她在街上難免成為Eye Candy，但她遇上的事卻令人費解！

畀人跟到返歸

曾在熙來攘往的銅鑼灣居住，Ana認為該處是香港最有Energy嘅地方：「呢度周圍都可以買到想要嘅嘢，以前喺度住，好開心！不過慢慢太多人知道我住邊，成日有人跟蹤我！」她曾在銅鑼灣被人跟了一大段路：「初時以為係記者，諗住應該跟一陣就走，但佢竟然跟我行晒成個銅鑼灣咁滯，後尾先發現佢冇拎住相機影，先知原來佢係路人，到我企係喺度望番住佢，佢竟然話我嚇親佢，係佢嚇親我至真！」本以為屋企是個安樂窩，豈料被跟蹤到屋企樓下，甚至行入大堂，最可笑的是她向管理員求救，對方竟然置之不理，她說：「我指住個男人同看更講佢跟住我入嚟，個管理員竟然唔理我，最後要打畀經理人求救，返咗公司先可以撇甩佢！」

雖然Ana經常在香港經歷不快事，但她不願意報警：「呢啲嘢當然會唔開心，但我個人好Positive（正面），寧願唔諗住，唔想搞大件事！我覺得一次半次，我又冇受傷，唔想畀呢啲嘢影響！」最後她搬離銅鑼灣，遠離煩囂，現時鄰居與保安關心她的安全，出入時都不時閒話家常，有時簡單的一句問候說話，足以令她更愛上香港。

後記：06等做Gym！

雖然Ana經常與夜蒲扯上關係，但她自言是個Morning Person：「我每晚八、九點就瞓，每朝六、七點就起身，最鍾意早啲起身做Gym！」雖然她怕人多，但仍抽時間堅持帶狗散步，希望在香港都可以找到自己的一套生活節奏！