盛女祖兒45度搞Gag

容祖兒前晚率領公司的Twins、林欣彤、泳兒及洪卓立出席《2012勁歌金曲優秀選第一回》，共捧走六個獎，令英皇成為大贏家，她笑言下年想染指唱作人獎項，因創作人交歌太漏氣。她更自認盛女，以45度與主持金剛對話。

天后容祖兒（Joey）前晚憑歌曲《我要玩》勇奪金曲獎及「最受歡迎廣告歌曲獎」，她笑說：「我想攞唱作人獎，恨做創作人，因為好多時都係我負責打電話催人交歌，好尷尬，我識寫就好，唔使再催人交，曾經想同人夾份寫歌，踏出第一步，但又自覺未夠能耐。」而主持金剛問到關於盛女的問題時，Joey不諱言自認盛女，並搞笑地以45度跟金剛交談，場面有趣！Joey又透露新碟將與不同公司的歌手合作，為樂迷帶來新鮮感。

阿Sa低調「試居」

而組合Twins成員蔡卓妍（阿Sa）及鍾欣桐（阿嬌）因効力無綫十年而獲頒金牌，阿Sa說：「希望新一個十年試啲新嘢，例如潛水、跳降傘咁。（效法鄭伊健同蒙嘉慧，同男友陳偉霆同居？）感情事不嬲低調，況且大家都好忙。（你有去佢屋企？）一時時，同正常情侶一樣。」

對於被指與緋聞男友羅孝勇同居一事，林欣彤說：「嗰次巨聲幫生日會，成班人上佢屋企玩咋！（唔接受同居？）同屋企人同居緊，第時結咗婚咪同居囉！（同羅孝勇傾過？）佢係好朋友咋！（戒去男士屋企？）睇做乜，依家夜收工，阿媽都會打電話畀我。」

此外，江若琳前晚穿上低胸裙輕露事業線，與許廷鏗、吳若希等為星煥國際娛樂捧走四獎。而新人陳僖儀得獎後落力演唱回饋歌迷。