Iris有膊頭錯就要認

今年可算是o靚模「爆E超蓮」鍾采羲（Iris）的是非年，捲入夜蒲不快事件、與好友及同門內訌等，但面對負面新聞，她未有被打沉，更得到家人和朋友支持，她坦言要活出自我，努力改進！

要數圈中「壞女孩」，不得不提24歲的o靚模「爆E超蓮」鍾采羲（Iris），單是今年夜蒲發生的不愉快事件，已掀起城中話題，短短數月負面新聞圍着她團團轉，提到這些不快事，Iris坦言「錯就要認，打就要企定」，她說︰「自己一定有唔啱，冇可能一啲錯都冇，好似打交畀人影到相，所以自己會去少啲玩。」

娛樂圈就是這樣子，藝人醜事總被揭得多，Iris深明此理，亦會盡量做好自己︰「惟有自己小心啲，依家唔同以前，自己嘅私生活好似去玩或者食飯咁，始終有人會影，雖然我唔係啲咩大明星，唔係好出名，只係Model，但點都一定會有人留意，所以我唔可以好似以前咁玩得咁盡咁癲。」

懶理負聞

負聞也許會影響星途，但Iris卻不擔心︰「我認為唔會有好大影響，反而我會諗點去做好啲，唔好令人對我更加失望。」她不理世俗的看法，令她未有想過要洗底，她說︰「出去玩其實唔係錯，因為又唔係犯法，我覺得冇問題，只係我會玩得小心啲，當然我會飲少啲，玩得多對身體都唔好啦！我要對屋企人同朋友都要有交代！」

在外國長大的Iris性格就是這樣率直，男仔頭愛玩的性格早已展露人前，但對她來說並非壞事，因這些負面形象沒有嚇怕追求者，她說︰「我唔覺得有太大影響，男仔追我都唔係睇我外表同外在啦，我覺得佢哋欣賞我嘅內在多啲，如果只係睇外在，哈哈，我怕我咁男仔頭會嚇走佢哋！」

家人力撐

一波未平一波又起，有傳她因形象負面而與好姊妹賭王何鴻燊千金何超盈反面，其後再爆出同門林宜芝（Monna）煽風點火及內訌，雖然Iris澄清與超盈沒有不和，但卻不願多談Monna，她說︰「唔想再提件事，呢啲都過咗去啦！我同佢係普通同事，大家工作需要，呢個係事實！」她又表示同門內訌公司未有照肺︰「公司冇微言，只係叫我唔好唔開心，做好自己就得，大家嘅對話冇提到任何人。」

Iris懶理外界目光，反而着緊家人與身邊朋友的評價︰「我入行屋企人已經好反對，當時好擔心佢哋點睇我，入呢行係我夢想，我怕佢哋會叫我唔好再做！」幸好家人和朋友不僅沒有責怪，反而一直力撐，令她放下心頭大石︰「屋企人好支持我，我好Surprise，當初發生呢啲事，我以為屋企人同朋友會話我，但佢哋反而好Support，所以發生咗事先發覺邊個錫我！」談到這些鼓勵，她非常感動，同時向家人許下承諾︰「屋企人今次叫我唔好理出面，只係問我係咪得罪咗人，之後大家冇再講，我真係好感動，所以要更加乖，唔可以再行差踏錯！」

後記：我要減肥

有哪位女生不愛瘦？Iris愛瘦的程度也許算是無人能及，訪問當日她經常把「減肥」二字掛在嘴邊，每換上一套衣服，她總是於鏡前說︰「我真係要減肥，我係咪真係好肥？」說真，小記看不出這些ByeBye肉，也許是她愛靚的副作用！