樂怡新婚被扠喎 洞房夜齋瞓

藝員姚樂怡與老公的新婚造人之夜慘遭湯盈盈破壞！由於盈盈前晚在婚宴瘋狂灌酒，新郎慘變醉貓冇得「造人」，勁掃興！

姚樂怡與老公吳俊匡前晚在Ritz Carlton酒店筵開30席，樂怡雖揚言隨時生小孩，不過因姊妹湯盈盈四處瘋狂灌酒，搞到新婚造人之夜多了兩名醉貓！樂怡昨日接受電話訪問時笑說：「佢哋連我15歲嘅細佬都唔放過，係咁灌佢飲，我老公件白色踢死兔變咗紅色，佢哋唔係隊酒，簡直係倒酒！我老竇都醉咗！」她戲言指新婚套房「屍橫遍野」：「我老竇瞓喺梳化，老公同細佬瞓咗喺床，仲要掉轉瞓（頭在床尾位置），搞到我都要掉轉瞓！（冇得造人？）梗係啦！」

新人被罰Kiss

樂怡透露沒有大搞婚後派對，只在婚宴場地跳舞唱歌至凌晨2時，她更自爆畀曾志偉搞喊：「志偉敬完酒突然衝上台唱《Endless Love》，話好開心啲女嫁晒，跟住就喊，搞到我都喊埋，一喊就停唔到！」她還上台與志偉流着淚擁抱，姊妹即播放致賀片催淚：「有好多藝人，同埋我同老公啲親友佢哋都搵到，我一路睇一路喊！」樂怡笑言難忘姊妹Catwalk進場時，現場嘉賓High到興奮叫囂的場面：「好感激姊妹留手，只係玩咗一個問答遊戲，不過我同老公畀人罰當眾Kiss，要班姊妹嗌停先得囉！」