關楚耀過兩招教吳雨霏偷心

曾有「地獄廚神」之稱的吳雨霏對烹飪興趣不大，但對懂得下廚的男仔會加添印象分，關楚耀日前就親自教她兩道去箍住男人心！

早前到台灣拍攝飲食節目的吳雨霏（Kary），每日食6餐肥了7磅回來，她說：「畀公司鬧死，但我做開運動好快Keep到。」她近年少食紅肉但最愛吃海鮮，曾被冠以「地獄廚神」的她笑說：「搣甩咗！」Kary坦言對烹飪不感興趣，但廚藝已大有進步：「都識得煮幾味，最叻整意大利粉，曲奇餅同甜品都拿手。」

阿媽唔畀入廚

她自爆母親也不讓她入廚：「佢話咪鬼燒咗我個廚房，但甜品好多時唔使開火。」又坦言如果男仔識得煮食，在女仔心目中確實會加分。

Kary日前以嘉賓身份跟DJ余迪偉亮相關楚耀（Kelvin）主持的飲食節目《關仁煮事》，Kelvin親手炮製「牛油芝士焗蠔」及甜品「心太軟」，他說：「呢兩味都好啱Kary，你要學整，食蠔可以箍住男人，學整埋心太軟，可以箍埋佢個心。」原來Kelvin的「心太軟」是由妹妹傳授：「我阿妹成日整畀男朋友食，都係跟佢學，本身唔鍾意食甜品，但覺得整甜品係一件令人開心嘅事。」Kelvin認為煮食不難，最重要是勇於嘗試：「加少少Style，自己邊煮邊試味就可以。」