黃建東如願溝夢中女神
2011年香港先生「最具演藝潛能大獎」得主黃建東（Derek），早前在《第三十一屆香港電影金像獎》中巧遇兒時的夢中女神唐寧及憑電影《大藍湖》勇奪「新進導演」的曾翠珊，他說：「嗰日我為無綫娛樂新聞台採訪金像獎，好開心曾翠珊攞獎，因為我都有份拍《大藍湖》，喺入面飾演唐寧前男友，我哋仲有場扮《羅密歐與茱麗葉》嘅戲中戲，可惜片長關係，導演刪走咗，但係我拍呢場戲時好開心，劇情講我同唐寧打情罵俏，激嬲佢現任男友，導演建議我自由發揮，唔使跟足劇本，畀咗好大空間我，最重要係可以同我兒時嘅夢中女神唐寧合作，真係勁開心！但係佢聽完我咁講之後就面紅紅囉！」
黃建東難忘與唐寧扮演羅密歐與茱麗葉。