吳卓羲黐老外洗底 英語升呢

吳卓羲昨日駁長頭髮，為啤酒品牌拍攝平面廣告，期間與外籍攝影師溝通似乎毫無障礙，算是替當年因一句「賣飛佛」而被嘲英文差的醜怪歷史洗底。

曾被嘲英語差的吳卓羲（Ron），昨日拍廣告時跟外籍攝影師溝通零障礙，令人聯想起當年他拍廣告時一句「賣飛佛」（My Favourite）的瘀皮往事。對此，Ron呼冤說：「我冇英文恐懼，同外國攝影師交流OK，深嘅咪請教人。（幫『賣飛佛』洗底？）我冇講錯，嗰時個老闆覺得啱至出街。（依家轉向緋聞女友張馨予學普通話？）我哋溝通係講普通話，但我係跟助手學。（幾時公開畀個名分馨予？）吓？做嘢先，感情事適當時候會講。」問到「適當時候」是否結婚的時候？Ron說：「搵夠先有得結婚。（如果有人等唔到？）我咪搵過第二個。」

家人搶音樂騷飛

Ron對於有份演出、群星拱照的無綫音樂總監鄧智偉的《平行回憶演唱會》被指銷情不太理想，他說：「唔會啩？咁多歌手一齊唱，林峯開Show好爆，我信智偉能力同才華。（周永恒話有飛送都唔睇？）每個人都有選擇權，但我屋企人就搶住問我要飛，我都買咗十幾廿張。（請張馨予睇？）叫佢自己買飛啦！」