蔡一傑撐有Guts「同類」黃偉文讚英雄

黃耀明前晚在演唱會上公告天下是「斷背男」，其「基者無懼」精神贏得圈中疑似「同志」拍掌叫好。多次跟同性密友傳緋聞的蔡一傑，大讚明哥敢作敢為有「Guts」，認為世界應大同：「好嘢係共存，唔好歧視每個人種，每一啲選擇，我覺得係好正常。」被傳「同類」的黃偉文則越洋在微博力撐，指明哥是朋友亦是偶像，但經過前晚後，明哥地位已昇華：「變成我的英雄」。

而曾傳是女同志的薛凱琪，指明哥宣布性取向令她想起張國榮，大讚明哥是「有Style嘅歌手」，更是值得珍惜的歌手。在台下目睹明哥在一萬人面前宣布「我係一個基佬」的林二汶，一度感觸落淚，大讚明哥「好嘢」，任何時間都支持他：「覺得唔使同人交代，佢咁做我好感動，冇預料佢講，好Surprise，好戥佢開心！」

同樣被傳斷背的歌手鍾一憲說：「幾好呀！喺呢個年代同性戀係好小事，唔係傷天害理嘅事，我非常支持同性戀者。（如果你係明哥會唔會介意公開性取向？）唔介意，但要配合公司，我強調現時唔係同性戀！除非影到我當街French Kiss就認！」藍奕邦亦在微博力撐：「明哥可能見香港這些年社會進步得太慢，或者應該是香港在倒退中，變得更落後，走出來以身作則，他的一夕話，其實不只是表面意思那麼簡單，而是叫大家，不要再繼續愚昧，繼續無知，繼續怕死。希望今晚過後，香港會真的再進一步。」