鍾舒漫當自強

近期全城搜尋「盛女」及「剩女」，有「宅男女神」之稱的劉心悠，原來對拍拖相當被動，她享受「慢慢嚟」的感覺，更自嘲「怪胎」；至於女歌手鍾舒漫則抗拒做「剩女」，她認為女人亦應當自強，感情事交由神全權負責！

快將28歲的歌手鍾舒漫（Sherman），是樂壇虔誠的基督徒，事無大小也會交託給神，就算感情事，她也放心交給上天安排：「我希望自己兩年內結婚，我對耶穌有信心，相信呢個夢想好快實現。（有對象？）對象嘅嘢交畀神去安排。（拍拖未？）好多朋友以為我拍緊拖，我話其實未o架！但我相信神迹。（拍拖會公布？）一定公布，始終係開心事，完全冇問題，至於婚姻，係需要時間經營。」

對於「盛女」、「剩女」成全城熱話，Sherman坦言沒有留意相關節目，再過多兩年便到30歲的她，其實頗介意被指為「剩女」：「好多時係因為一講到某個歲數，外界就會標籤為『剩女』，其實唔好畀年齡『框住』，況且據我所知，節目入面只係講幾個Case，唔可以代表晒所有女人。」

Sherman堅決否認自己是「剩女」：「我絕對唔係『剩女』，依家剩女呢個詞語，畀人負面感覺，若然唔同我解釋清楚係『盛』定係『剩」，好易令人混淆。」她笑稱若是「盛女」的話，現時只欠另一半：「工作、家庭同朋友依家都努力去緊，只係爭嗰另一半。（自己嘅位置？）算係人生轉捩點，呢幾年工作上有好多突破，但理財方面就好差，要家人幫手，但又唔可以一世依賴佢哋，我要好好學識理財，要畀父母可以安心退休，依家盡量安排每年去一次旅行。」

讚Kay撐起頭家

Sherman更認為現今女性必須自強：「呢個係事實，好多女性不甘安在家中，如果將來結婚，我仍會相夫教子，但同時亦會有自己人生，唔會輕言退休。」她又以謝安琪作例子：「好似謝安琪（Kay），我覺得佢幾強悍，就算有好多負面批評，同埋承受壓力，但佢撐得好好，管理頭家又OK，相信係因為佢兩公婆磨合得好好。」

若然舉行《盛男大作戰》會否有興趣收睇？她笑說：「一定有興趣，自己身邊都有唔少男性朋友，有自己思想同目標，唯一嘅係呢個年紀（指近30歲）嘅男人，唔想咁快組織家庭，部分係想擁有自己事業先，到30幾甚至40歲先諗結婚。」

有信心兩年內嫁

入行五年的Sherman緋聞不算多，令人深刻的是與張致恒（Steven）的緋聞。對於早前有粉絲指Steven向她「求婚」，她一頭霧水說：「我笑死咗，我同佢係好好朋友。（尷尬？）咁又唔會，就算同佢一齊拍劇都冇問題，我有睇佢拍劇，不嬲對佢演技有信心，平時一齊做嘢都覺得佢搞笑！」

談到擇偶條件，她說：「我無國界嘅，冇枷鎖畀自己，隨緣啦！呢排我都留番長髮，唔會再剪，我希望自己兩年內結婚，我對耶穌有信心。」

後記：冇導人迷信

入行5年才推出首張國語專輯的Sherman，歌曲《他不是你》甚受歡迎，她不認為遲了出國語碟，亦不覺得蝕底。對於經常提及「神」，問到會否擔心被指導人迷信？她說：「唔擔心，超級清楚自己做乜，唔會理閒言閒語，絕對唔係導人迷信。」