Eason Call老婆人肉速遞造B

恨再做老竇的陳奕迅宣布造「龍B」失敗，改為趁在倫敦舉行巡迴演唱會時力攻「蛇B」，更越洋召老婆徐濠縈赴英國「造蛇仔」。

陳奕迅（Eason）和徐濠縈的女兒康堤將滿8歲，一直想再做老竇的Eason早前自爆想追多個，並趁「龍B」熱潮趕造人，他早前下午於茶餐廳用膳後離開，撞正一對夫婦湊着三名可愛的小朋友，Eason流晒口水望實BB笑騎騎，更扮Cute氹BB。

身形脹爆難買衫

據知，Eason夫婦一直努力造「龍B」，食茶餐廳當晚，老婆徐濠縈偕女兒康堤約好友黃偉文及其密友食晚飯，為趕回家「造人」，阿徐食完飯後即急急腳離開。不過，Eason宣布造「龍B」失敗。身在倫敦準備巡唱的他，透過長途電話表示會有數天假期，努力工作之餘亦會努力造人，他說：「大家畀啲空間我啦！生龍B趕唔切喇！嚟緊好多嘢做，巡迴演唱會做到明年，7月又要出廣東碟，仲有好多廣告拍，所以生蛇仔啦！今年要努力搵夠3億添！」為配合Eason的造人計劃，阿徐將赴英國睇騷兼造「蛇B」。

另外，有指Eason近來不斷「發福」，阿徐公開大爆他超磅及膽固醇超標，勒令要他減肥。Eason日前到時裝店試新衫，脹爆身形令他難以配襯合心水的靚衫。問到減肥計劃？Eason在電話中笑說：「我好乖減緊o架喇！趁老婆未嚟倫敦密密食。」