啟剛戒酒瘦身年底娶晶晶

霍啟剛與郭晶晶近日高調出席活動，啟剛雖否認十月結婚，但據知兩人婚期在年底舉行，啟剛更積極減肥準備婚禮。他倆出席活動後撐枱腳，認真恩愛！

霍震霆長子霍啟剛與拍拖七年的「跳水公主」郭晶晶，前晚罕有地高調孖住出席活動，霍家準新抱地位漸趨穩定。晚上8時25分，兩人步出活動會場，啟剛大方向記者揮手微笑，晶晶則貫徹低調沉默作風跟隨上車。他倆到灣仔君悅酒店醫肚，抵埗後晶晶怕醜微笑，啟剛隨後下車，再向記者大方揮手，其後結伴入酒店撐枱腳。

恩愛撐枱腳

昨晨，啟剛轉Look換上運動風褸、牛仔褲襯波鞋，以「香港青聯」副主席身份任小型足球賽開球禮主禮嘉賓。他表示已多年沒有踢足球：「冇細佬咁叻，我打網球同做Gym多。（瘦咗？）係，做運動同均衡飲食，酒同果汁都少飲。」瘦削不少的啟剛積極減肥，似乎為影婚紗照及婚禮做足準備。提到盛傳兩人婚期定於今年十月，他先不耐煩，其後才笑說：「係囉！點解你哋無喇喇會咁講？邊個寫o架？（已準備好結婚？）你哋會知得多過我。（十月拉埋天窗？）唔講住，今日係講踢波。（今年內結婚？）冇講。（你哋已經有計劃？）唔講喇！遲啲先。」問到拍拖多年已接近談婚論嫁的地步，為何仍保持神秘？啟剛幽默地說：「有神秘感嘛！」開球儀式後，他仍留在場地與友人聊天，直至下午1時才離開。其後，啟剛獨自登上七人車到大坑中華遊樂會，相信是會合準老婆晶晶醫肚。

午膳後，「剛晶」換過裝束出席晚上的《香港海洋公園保育基金珍愛國寶慈善晚宴》。任海洋保育大使的晶晶穿紅色旗袍，啟剛則以黑色西裝褸襯牛仔褲，似足一對新人；同場還有任關懷大使的黎明。