剩女何傲芝 等待「真」男人

外形嬌小玲瓏、外表清秀的無綫藝人何傲芝（GiGi）理應不乏追求者，但與無綫小生蕭正楠傳足成年緋聞的GiGi偏偏「Dry到爆」，年屆28歲、步入「剩女」之年的她坦言恨拍拖！

最近桃花大旺的何傲芝，先後與官仔骨骨的蕭正楠（Edwin）和搞笑能手阮兆祥（祥仔）傳緋聞，但她強調仍然單身，渴望有一個疼她的男友：「我想30歲前結婚！（擇偶條件？）最緊要錫自己又有Feel，可以傾深入嘅話題，最好相處時就算各自各做嘢都好舒服。」她揚言欣賞性格率真的男人：「最好會提點我嘅表現好唔好，但通常啲人會怕我唔開心，就會話『你表現幾好呀！』雖然同我講真話我會唔開心，但我會好珍惜呢啲意見！」

GiGi大讚Edwin真性情，可以考慮與他發展：「佢好真，唔會轉彎抹角，我同佢好啱傾！（考慮拍拖？）可以考慮！但我需要啲時間，因為佢嘅事業愈嚟愈好，而我又啱啱開始拍劇，我想拍多啲劇先！」

妹妹打開娛圈路

由賽馬節目主持人搖身一變成為藝人的GiGi，原來全靠妹妹何傲兒（Lily）為她打開進娛圈之門。Lily於2007年參選港姐並獲「旅遊大使獎」，GiGi表示妹妹替她一圓參選港姐的心願：「我哋細個都有玩扮港姐，會自製后冠、用廁紙扮彩帶！如果我高啲，我都會參選！」問到父母有否反對她倆加入娛圈？Gigi笑言幸得妹妹開路：「妹妹參選時，爹哋都想佢專注讀書先，但妹妹加入娛樂圈後，父母亦唔反對我簽約加入無綫！」

問到會否怕與妹妹比較？GiGi笑說：「一定唔會！我哋會互相幫助，妹妹要做主持時我會幫佢Practice；妹妹就教我做戲，之前我第一次拍劇，拍《東西宮略》，佢仲教我睇燈位！我希望我哋可以合演電視劇，最好飾演情敵！」

樂小姐鼓勵簽約

GiGi於2009年加入無綫成為《東張西望》主持，直至去年才正式簽約無綫，原來她簽約無綫全憑無綫高層樂易玲的一句話：「我簽約前舉棋不定，但樂小姐話『你梗係要放心啦！因為公司一定會Support你o架！』」她更披露樂小姐風趣的一面：「舊年年底我畀記者影到同祥仔買被，估唔到樂小姐有日一見我就講笑話『點呀！買被呀？』平時嚴肅嘅樂小姐都好玩得！」

對祥仔「動情」

外表看來柔弱的GiGi，原來性格既正義又剛強，她笑說：「之前我同祥仔拍《東西宮略》，有一幕戲講我狂鬧佢細膽怕事，我嗰時真係好入戲，鬧到佢死，事實上因為我份人最討厭啲人唔爭氣，所以當時我動咗『真情』！」看來Edwin亦要加把勁努力工作，奪GiGi芳心！