四哥做好心拍賣「冰鮮精」

向來「語出驚人」的謝賢（四哥），昨日拍攝養生產品廣告時力指自己精子「基因優良」，更笑言會將精子放入雪櫃，以備將來拍賣！不過，他卻表示不會再生，認真可惜！

四哥和郭少芸昨日為《古漢養生精》拍攝廣告兼擔任代言人，四哥賣花讚花香指服用了該產品後，身心均變得年輕，問到會否與女友CoCo生BB？他即耍手擰頭：「仲生得出？唔生得喇嘛……」又大讚自己基因優良，揚言要雪自己的精子，假以時日拿出來拍賣，問到是否作行善之用？他說：「做善事唔使喇啩！咁用一半啦！」

不過，四哥指不會因心境變得年輕而跟o靚模拍拖，自言不會「玩玩吓」：「我依家都唔蒲，況且都沉晒落海底，蒲唔起喇！」談到女友CoCo，他指二人已拍拖八年，並叮囑記者：「你哋要錫住佢呀！」由於四哥透露學成歸來的CoCo主要讀家政及維護感情妙方，記者即取笑她像兩性關係導師，雖然四哥不明所以，但當記者問他會否如Santino般45度望人時，他即大罵黐線：「咁冇禮貌同冇風度嘅嘢我係唔會做，同人溝通永遠都係用正面，大大方方。」

准霆鋒風流

談到兒子霆鋒跟楊冪的緋聞，四哥說：「人不風流枉少年，不過風流好喇！唔好下流就得！」問到會否幫霆鋒找女友？四哥竟說：「我同佢唔係好熟，佢嘅私生活我理唔到。」他又指霆鋒與栢芝雖離婚，但仍可成為朋友：「睇我同拉姑依家幾好。」