祖兒連環開餐好食得

身形弗爆的樂壇天后容祖兒，原來相當食得！前日她連環約朋友四出喪食，先與女友人到中環開餐，醫肚後3粒鐘，竟再與劉浩龍及黃偉文到跑馬地歎日本菜！

容祖兒經常跑步練氣，加上戒食紅肉多年，都是為了喼住弗爆身形及靚聲。現正忙於籌備巡唱的她，前日趁不用開工放縱，相約好友連環擦餐飽！

前日下午6時，戴住黑超、身穿紮染連身短褲、腳踏Isabel Marant限量版紮染波鞋的祖兒，與女友人及助手在中環開餐。只見沙律、Pizza、炒飯、羅宋湯及麵包擺滿枱，祖兒亦大開食戒，開懷地大啖大啖地食，更不忘邊食邊與友人吹水，動作多多！食至尾聲，祖兒人有三急，助手陪往洗手間解決。擦足兩小時，祖兒主動埋單請客，還豪爽地給了侍應100元貼士。

「緋聞男友」曝光

才食完3小時，祖兒於當晚11時與劉浩龍到跑馬地一間日本餐廳開餐，其後黃偉文（Wyman）亦會合。問到為何咁遲？Wyman說：「我啱啱開完會！」凌晨2時半餐廳打烊，三人才由後門閃人。另外，Wyman在微博上載一張與祖兒及浩龍的合照，並寫上：「Hahaha！緋聞男友2012！」祖兒好友何韻詩留言：「咁我讓畀你啦！」有人問讓給誰？阿詩回應：「咪就係讓呀邊個畀呀邊個囉！」