啟剛細心護晶晶預演婚禮

盛傳10月拉埋天窗的霍震霆長子霍啟剛與跳水公主郭晶晶，昨晚着情侶裝拍拖出席活動，明顯瘦了一圈的啟剛更細心輕扶晶晶，十足預演婚禮！

霍啟剛與郭晶晶拍拖逾7年，對感情事極之低調，更鮮有拍拖出席公開活動。早前盛傳他們今年10月結婚，但亦有傳因霍家爭產令婚期押後！二人至今未有正面回應婚訊，但昨晚竟身穿情侶裝出席活動，晶晶的地位更加得到肯定，看來好事近！

昨晚7時左右，啟剛與晶晶齊齊以黑色Look赴會，更大方地企定定合照，不過看來有點怕醜，未有在人前拖手！但期間啟剛輕扶晶晶玉背，可見體貼一面！啟剛亦比前瘦了一圈，似乎要為結婚努力喼弗！問到是否結婚？他們沒有回應就步入會場，啟剛說：「入咗去先！」逗留至約8時25分離開。另外，晶晶今日獲香港海洋公園保育基金委任為海洋保育大使，並於晚上出席基金的慈善晚宴。

許鞍華：金像獎要檢討

另外，昨日的嘉賓還有諸葛紫岐及丈夫薛嘉麟、許鞍華及陳霽平等。對於爾冬陞指「金像獎只有感性，失去了專業」，許鞍華說：「都有啲覺！（你覺得佢指咩獎？）我估佢係泛指《金像獎》幫咗香港電影，有啲感情分，雖然我係受益者，好多謝，但都要檢討！（戥劉青雲唔抵？）一個獎只係畀一個人，一定各有擁躉，有咩唔愉快就講出嚟，講出嚟就冇事！」