嘉穎變箭靶 避戰救火

視帝鄭嘉穎人紅是非多，不但遭拍檔冼灝英公開插爆性格有問題，更被網友譏為「橡膠穎」！為免「火勢」愈撥愈大，兩面受敵的他封嘴避戰，實行清者自清！

向來易惹是非的無綫視帝鄭嘉穎，最近再度惹火頭，他主演的劇集《拳王》播出不久，即傳出被拍檔冼灝英力數。已離開無綫的冼師傅，直斥嘉穎性格有缺陷，為人自我，對人態度差，故合作以來不時有摩擦。據知，二人拍攝期間已不咬弦，令同劇的洗灝英徒弟黃浩然與黃澤鋒，私底下亦與嘉穎冇偈傾！而網友對嘉穎這個無綫一哥亦毫不客氣，不但為他改花名「橡膠穎」，更批評他演技不外如是，十足陪襯，更有人力撐黃浩然演得比他更出色！

洗牙擋煞

身在廈門開工的嘉穎，坦言看過冼灝英的言論：「唔同人有唔同睇法，唔識我嘅人有誤解，我唔會多作評論，總之熟我嘅人知道就OK。」不過未知是否有感黑氣纏身，他日前趁在港時，急急洗牙擋煞避是非！前日下午4時許，他在觀塘出席活動後，由司機接載到灣仔，由於正下大雨，他友善地着記者上車，以免淋濕，並自爆去睇牙醫，他笑說：「人行得多都要修理吓啦！」而大前日他則理髮扮靚靚，一於執靚個Look繼續Chok！

眾女護航

嘉穎兩面受敵，幸獲同劇女拍檔力撐，其中李詩韻不相信冼灝英會鬧爆他：「我冇見過佢兩個有拗撬，大家有意見都係為件事好，我接觸過嘅嘉穎一啲都唔寸，反而性格好真、好爽，我哋仲可以做到真正嘅朋友！」而唐詩詠則笑言拍攝過程很辛苦，相信大家已沒有氣力拗撬：「每個演員都要有主觀態度，我唔覺得嘉穎會將情緒發洩喺其他人身上。」而有份客串的徐子珊則說：「會唔會係言語上嘅誤會？我識嘉穎咁耐，知佢係咩性格嘅人，佢係比較率性啫！」