Super Gear愈跳愈Hot嘈嘈閉

「港版AKB48」Super Gear由20多位青春活力少女組成,少不免有爭寵、攝位、是非及不和新聞,不過日前其中11個成員邊唱邊Show舞技時,雖然嘈到拆天,但卻齊聲表示會團結一致打響名堂!

Super Gear靈感來自日本組合AKB48,挑選青春活力少女,部分成員均有正職,包括救生員、普通話老師及模特兒。日前其中11個成員在經理人漢洋陪同下會見傳媒,即場邊唱邊跳顯舞技,初時她們相當怕醜,不敢發言,經過一輪熱身後,即嘩鬼叫嘈到拆天,連漢洋都說:「好嘈呀!」

問到有否發生不和?成員Kaii說:「唔會!如果有拗撬我會做和事老,每個成員都有自己專長同優點,互補不足。」成員Kelly則表示為鞏固姊妹情曾舉行宿營:「慢慢傾出感情,我哋會和諧相處。」由於組合會不停加人及減人,問到會否擔心被淘汰?她們充滿信心地說:「唔擔心!」

現時成為娛圈一分子,她們表示言行舉止都會特別檢點,Kaii說:「始終公眾人物,不過我唔驚,行得正、企得正,冇嘢唔見得光。(預咗被起底?)起囉!無事不可對人言。」而漢洋強調與Super Gear約法三章:「我同佢哋講,如果想衰就鬧是非、不和啦!咁就唔使做o架喇!」

漢洋率領11位Super Gear成員登場。

身穿低胸小背心的Irina,特別養眼!

成員Jay載歌載舞,Sell青春活力。