Elise借Baby上位 純服宅男

加入o靚模組合冬甩已第二年的陳芷敏（Elke），今年會繼續影寫真，除拍住一班舊隊員外，還會跟新血、「翻版Baby」陶嘉瑩（Elise）合作，兩人同樣走清純路線，誓言不靠事業線吸睛！

每年都有不少模新血湧現，要性感有性感、要身材有身材，要突圍而出談何容易？獲欽點為冬甩新成員、現年17歲的陶嘉瑩（Elise）有天使面孔，但冇魔鬼身材，幸而有一雙纖幼長腿挽回分數，其三七面更激似潮模Angelababy，有望借「翻版Baby」之名上位！她直言幾年前已開始被同學及朋友仔冠以「翻版Baby」的外號：「可能我分中間界，依家好少女仔會咁分，感覺似Baby啱啱出道嗰時，我本身都好鍾意Baby，覺得佢着衫好靚，都有睇過佢啲寫真。」

喪刨雜誌惡補

由於Elise當模特兒經驗尚淺，故近日頻頻刨時裝雜誌惡補，日日在家對鏡練習擺甫士，鍾情畫畫的她期待可將作品放入寫真，跟粉絲分享畫作。

此外，Elise將跟冬甩成員合作，包括師姐陳芷敏（Elke），Elke比Elise年長三年，但只相處幾天已非常熟落，絕無代溝！兩人都走清純路線，暫無意跟其他模鬥性感，認為各有市場，Elke說：「我入行到依家都唔係行性感，有啲客戶都係因為我形象清純先搵我拍廣告，暫時都想繼續以呢個方向行住先！」她希望今年可以學同公司的謝芷蕙（Cammi）般，密密返內地登台搵真銀！