過來人祥仔：內地拍劇似坐監

黎耀祥於新劇以奸雄姿態與鄭則士大鬥法，他直言不會因演奸角而有所保留，認為奸到盡才能過足戲癮。對於不少藝人北上掘金，他以「過來人」心態大唱反調，更說：「好似坐監咁，好枯燥o架！」

視帝級的黎耀祥一反近年演出的忠義形象，於《盛世仁傑》中擔演奸角，問祥仔可擔心觀眾不接受？他即說：「近年都冇乜演過奸角，今次真係過足戲癮！演員唔應該畀自己框框，幾衰嘅角色都唔應該留一線，咁先好玩。」

對於劇集賣點落在「視帝」祥仔單挑「影帝」鄭則士身上，祥仔說：「合作得好好玩，擦出火花，呢類戲一定要兩個人都夠分量先做到，產生到嗰種張力，大家先會遇強愈強、先至鬥到！」

直認同鄭則士「鬥」

兩位好戲之人近年再合作即爆出火花，問到當年有否也傳爭戲不和？祥仔聞言笑說：「我哋加埋百幾歲啦！影到嗰啲激嘅場面，只係我哋討論緊戲份。兩個都咁資深，埋到位鵪鶉咁就唔得啦！」

近年內地製作以銀彈掘走不少香港演員，有價有市的祥仔卻不為所動，最近更與無綫續約，他說：「其實內地拍劇比香港辛苦十倍，雖然休息時間會好啲，但要適應天氣，內地拍劇好多年前我都試過，好似坐監咁o架！收工就返房休息同睇劇本，好枯燥。」