城城扑中三T袋百萬

榮升馬主的郭富城坦言賽馬博彩是考眼光遊戲，他不會沉迷賭博，更自爆曾刀仔鋸大樹，下注數百港元買三T，結果贏逾百萬港元。

郭富城、林莉、何傲兒與Alice B.等昨日出席跑馬地馬場活動，城城坦言其愛駒已抵港，正在沙田馬場操練：「隻馬嚟咗冇幾耐，依家我拍緊戲，冇時間睇，而且我住跑馬地，如果可以，都會將隻馬搬番嚟跑馬地，近我多啲可以成日探佢。」問到可有投注博彩？他指視乎心情而定：「我係鍾意個過程，我覺得賽馬博彩係考眼光嘅遊戲，要贏都要配合天時、地利、人和。」他透露曾買三T贏逾百萬元：「我用幾百蚊贏咗七位數字，係刀仔鋸大樹，要當一個遊戲心態去玩，千祈唔好瘋狂沉迷賭博，始終呢啲都係彩數。」又表示中獎後與同事分享歡樂：「嗰日剛好公司食團年飯，封利是畀佢哋。」

林莉搵馬主朋友

城城坦言受朋友感染而愛馬：「有朋友養馬，養成兩匹以上，不知不覺就畀佢哋感染咗！我以後會抽多啲時間愛錫隻馬！」問到若愛駒勝出會否帶女友熊黛林拉頭馬？他沒有正面回答，只表示每個人都可以去。此外，他指在微博得知朱茵與黃貫中雙喜臨門：「有喺微博恭喜佢哋，佢哋都拍咗十幾年拖，總之祝佢哋新婚快樂，依家唔止兩個人嘅事，組織家庭好戥佢哋開心!」

同場的林莉笑言希望贏錢，問到會否考慮找馬主做男朋友？她笑說：「做朋友先，呢個活動嘅時間唔夠，都會再約，我個人八卦，鍾意結識唔同圈子嘅朋友，可以學到唔同嘅嘢！」