蔡一智太太 有喜7個月
47歲的草蜢成員蔡一智（阿智）昨日宣布再榮升爸爸，他在電台節目中表示與太太周雪芳一直不設防：「太太有咗7個月，預產期下半年，已經訂咗床位，冇話特別去追，係個天畀我。」阿智坦言有小朋友是一件很難的事，感激上天送他這份寶貴禮物，問到BB性別？阿智說：「有啲眉目，但唔肯定，唔想講住。（想仔定女？）仔女都冇所謂，老婆都係咁諗，反而兩個女想要細佬。」他透露被不少朋友取笑為「外父相」，問到會否再追？阿智說：「我仲有心有力，生幾多都可以，佗B唔係我，係我夫人，要尊重同睇太太意願。」
其後，阿智在微博上載BB的超聲波照，獲不少圈中人轉載及留言，好友袁詠儀說：「恭喜！魔先生（囝囝張慕童）很快可跟你見面啦！小蔡B（以公仔頭代為BB）。」身為周雪芳契細佬的梁烈唯說：「嘩！我再做舅父了！恭喜！恭喜！」
蔡一智宣布太太懷孕7個月，但拒透露BB的性別。（資料圖片）