鎮宇賀青雲輸獎贏友誼

今屆《金像獎》圓滿結束，劉青雲大熱倒灶失落影帝，幸得好友吳鎮宇力撐！他昨日話中有話表示，相比某某某輸掉民意及好友，青雲落敗更值得恭喜！

吳鎮宇及港姐呂慧儀昨日為品牌行騷，而李蘊、羽翹及裕美等任嘉賓。雖然呂慧儀低胸又晒腿，但鎮宇出場時即吸引女士尖叫，搶晒風頭，而他亦風騷地照單全收，更笑言平日聽慣尖叫聲：「太太同囝囝成日叫喊！」他自爆囝囝是天生演員，最擅長扮嘢，但他抗拒囝囝入娛樂圈，也抗拒父子兵上陣：「偶有機會合作都無妨嘅，不過唔會刻意栽培囉！」

囝囝預知賽果

鎮宇笑言囝囝有預知能力，一早已預知青雲落敗《金像獎》：「叫囝囝講Uncle Sean（青雲）Wins，佢係都唔講個Win字，不過青雲輸咗佢就即刻話『Uncle Sean Loses』！」問到有否安慰青雲？他即暗寸說：「我恭喜佢，我話咁樣你會多啲朋友，唔會好似某某某咁冇晒啲朋友！如果要用嗰舊嘢（獎項）嚟證明，咁去花園街買個擺喺屋企都得！」雖然未有開名「某某某」是誰，但他愈講愈High，指《金像獎》對外來人不公平：「外地同內地人冇香港嘅人際網絡，少咗一半分數，因為個制度有感情分，佢哋又人生路不熟！不過《金馬》同《奧斯卡》都係，每個頒獎禮都有缺陷！」此外，他落實7月拍攝《衝上雲霄2》。

慧儀獲准「開門」

至於「中門大開」的呂慧儀則表示，老公不介意她工作上行性感，又自爆努力Keep Fit迎接仲夏，故冬天才考慮「造人」。而嘉賓之一的韓模崔豪進（Jin）則否認與鄭欣宜拍拖：「我哋喺工作上認識，佢有提過感情狀況，後來話同男友分手！」但他暗示不是第三者。