葉德嫻自嘲廉價影后

出爐影后葉德嫻（Deanie）人紅，但片酬不高，自嘲廉價影后的她笑言日後「有得拍就拍」。

葉德嫻憑《桃姐》再下一城，於本屆金像獎首奪影后寶座。前晚頒獎禮結束後，她與台前幕後拉隊出席投資方博納電影的慶功宴，心情大靚的她更不介意公開談片酬：「我不嬲都係廉價勞工。（六料影后喎？）咁又點？影后唔代表一定可幫電影賺到錢。」她笑指自己冇「影后價」，總之有合適的工作便接。據悉，Deanie姐當初接拍《桃姐》實收約80萬港元片酬，與奧斯卡金像影后梅麗史翠普情況相似，可謂平靚正，這位六料影后今次更橫掃中港台票房，威力相當驚人，酬勞低於市場價，自嘲廉價勞工絕對不誇張。

100萬拍新片

Deanie姐曾表示拍完《桃姐》後「乏人問津」，冇片約在手的她聞得王晶有意找她演《桃姐38D》，前晚她在慶功宴上舊事重提：「咁其實38D代表啲乜？哦，即係鹹濕嘢。」雖然似玩笑一則，但原來Deanie姐已悄悄與對方達成合作協議，記者昨致電王晶，他說：「幾時開要睇劇本，總之今次拍喜劇，仲會群星拱照葉德嫻。（畀啲乜挑戰Deanie姐？）佢演技、歌藝都咁得，冇難度啦！依家有兩個方案，睇吓我親自操刀，定係交由葉念琛執導囉。（片酬方面點？）我同佢都心中有價，從來唔會拗數。」據知，Deanie姐以逾100萬港元接拍王晶的新片。而Deanie姐昨日接受電台訪問時透露計劃11月到澳洲睇日蝕。

許鞍華有壓力

另外，許鞍華四奪金像獎「最佳導演」。談到箇中感受，她說：「有少少壓力，因為攞咗咁多次（獎）。以前靠攞獎救票房，好彩今次票房都收得。」同場的徐克同樣為《龍門飛甲》狂掃五獎而大感興奮，亦戥Deanie姐封后高興，形容對方實至名歸。