葉德嫻禁食衝擊影后

香港電影金像獎舉行在即，早前在各地橫掃多個最佳女主角殊榮的葉德嫻（Deanie姐），下個目標直指金像獎影后，不過她卻認為對手舒淇、周迅、湯唯及高圓圓一樣有機會奪獎，她又笑言為保持Fit爆狀態上台，當日要禁水禁食以免水腫。

五料影后葉德嫻半年內憑電影《桃姐》連續在多個頒獎禮封后，包括威尼斯電影節、愛沙尼亞電影節、台灣金馬獎、亞洲電影大獎及香港電影評論學會。《第31屆香港電影金像獎》於4月15日假尖沙咀文化中心舉行，有份角逐「最佳女主角」的Deanie姐被視為「絕對大熱」。不過謙虛的Deanie姐仍不敢說Sure Win：「每個地方嘅評審都唔一樣，唔係話香港就有着數，所以我覺得大家機會均等。」Deanie姐在台灣金馬獎奪得最佳女主角後曾笑言要禁水忍尿，今次面對金像獎，幽默的她笑言會做足「準備」：「朝早飲杯水之後就唔飲，亦唔會食嘢，件戰衣好窄㗎！始終女人夜晚會儲水啲，個人會脹咗矮咗！」

談到其餘四位對手，Deanie姐表示尚未看過她們的提名電影，但仍大讚湯唯及舒淇演技好：「睇過湯唯嘅《色，戒》，佢好勇敢！叫我做，就好驚喇！哈哈！舒淇就不嬲演得放，係一個識演戲嘅靚女。」

貪食愛上表演

問到如何練得一身好演技，沒有正式學戲的Deanie姐表示自小跟父母看粵劇，其後因貪吃而愛上表演：「班工友鍾意叫我唱歌跳舞，跟住就請食荔枝龍眼！」Deanie姐的觀察力及幻想力亦佳，聽歌時會「看」到畫面，亦愛留意身邊的人的舉動：「我行街鍾意望人，就算掃街嘅我都會捕捉佢嘅神態。」曾在金馬獎及金像獎各兩奪女配角，Deanie姐演技早已獲肯定，她表示82年在台灣得獎那晚印象非常深刻：「嗰次係第一次去台灣，而且條樓梯好長，我行咗好耐都未上到台，又驚仆親喎！去到後台，鄭少秋有豎起手指讚我。」