周子揚恨拍劇 靠鍾嘉欣入屋

唱作歌手周子揚為新歌拍攝MV,他表示模特兒女友徐靖雯亦有探班,雖然未有煲湯送暖,但已令他甜入心!而即將拍劇的周子揚,更講到明恨與鍾嘉欣合作!

周子揚(Hinson)日前為新歌《木頭車》MV拍足4日4夜,相當辛苦,問到其模特兒女友徐靖雯(Jenny)有否到場探班?他即冧笑說:「都有嚟,佢話好支持呢首歌!(煲湯畀你?)冇,但佢喺精神同說話上支持我,鼓勵咗我好多!因為佢做完嘢放工嚟探班,所以嚟咗一陣就要返屋企休息,都覺得佢好有我心!」

拍咀戲向女友備案

而最近簽了無綫藝員及歌手合約的Hinson表示,希望能夠拍劇「入屋」,令觀眾對他加深印象。問到無綫藝人眾多,最想跟哪位藝人合作?他說:「鍾嘉欣!我有追佢套《缺宅男女》,佢做感情戲做得好收放自如!同埋平時喺無綫撞到佢,佢都好Nice,希望除咗可以同佢拍劇之外,都可以寫歌畀佢!」問到如拍劇有激吻戲,女友Jenny會否生氣?他即賣口乖說:「唔會嬲!佢好大方,亦明白做呢行嘅工作,但我會同佢備案先!」

音樂組

周子揚恨與鍾嘉欣合作拍劇,更打算寫歌給她。

周子揚坦言如拍激吻戲會先向女友備案。

周子揚為新歌拍攝MV。