Jeana摸手仔 引Dash啜嘴

首次擔正拍電影的樂隊Mr.艷福不淺，除主音Alan與詩雅談情說愛外，成員Dash更與模何佩瑜（Jeana）奉旨親熱，但二人拍攝當日才知要埋身肉搏，Jeana惟有主動情挑Dash培養感情！

樂隊Mr.最近Rock入大銀幕，與寸嘴模Jeana、詩雅及林欣彤等拍攝音樂電影《起勢搖滾》，首度拍戲的Mr.坦言非常緊張，其中正在蜜運的主音Alan首日開工便要與詩雅談情，他說：「我開頭極度緊張，真係好唔慣，仲要同詩雅未熟，所以好尷尬！好在熟咗之後再拍一場強吻戲，可以一Take過。」

Alan奉旨取笑

另一成員Dash則要與Jeana埋身肉搏，但他竟笑言怕怕︰「唉！最麻煩係到拍嗰朝先知，完全冇準備，真係唔知點做，知道後真係淆底，想揸車走！」Alan插嘴說︰「場戲我係負責笑佢，而我真係真心咁笑佢。」Dash還自爆狂NG：「Alan話我鬼咁醒目，話好唔抵得！」Dash未拍先淆底，Jeana惟有主動情挑︰「Dash好怕醜，第一日見面就要拍錫戲，所以我哋之前Warm Up吓先，拖住佢隻手培養感情。」

首度與Mr.合作的Jeana，自言被他們對音樂的堅持吸引，眾人希望透過電影鼓勵有理想的青年追夢，Alan更希望外界正視Band友被趕絕的問題：「我想多啲人了解玩音樂係冇傷害性，只係發洩情緒，要畀空間玩Band嘅人，如果唔係藝術文化會沒落。」