孖Iris鬧爆Monna 超盈：借刀殺人

近日有指賭王何鴻燊千金何超盈在Facebook笑指「爆E超蓮」鍾采羲（Iris）腦殘，即被屈跟Iris割席，超盈和Iris昨日在微博反擊，矛頭直指放料人、Iris同門師妹林宜芝（Monna）！

去年有指Iris跟Monna曾因爭拍寫真月曆，搞到面和心不和。然而Iris近日是非多多，早前更無端捲入中環爭仔打交事件，Iris夜蒲的好姊妹超盈，笑指Iris「冇腦」惹禍，即被有心人穿鑿附會，在明查暗訪下，據知放料黑手正是Monna。

超盈和Iris姊妹情深，昨日更在微博對抗外敵，暗名爆出黑手！超盈率先寫道：「發覺現在網上嘅嘢已經毫無私人空間，因為之前同朋友開的小玩笑令到鍾采羲Iris身邊的小人有機可乘，好一招借刀殺人！心計重得連傳媒也利用，作故事的人，請你以後小心言行，不管你的目的是甚麼，請不要麻煩我！」Iris立即回覆超盈，令黑手身份呼之欲出，她寫道：「那麼多無聊時間編故事去害人，倒不如好好努力工作，有時間跟佢啲『好友』去馬場吹吓風好過......唔好意思，無啦啦用你個名做新聞sorry dear！」擺到明暗指黑手是馬場獵仔斷正的Monna。

記者致電Iris，問到微博所指的爆料人是否Monna？她說：「已經寫到好明，圈子咁細，啲人做過乜心知肚明，最慘係搞到朋友同屋企人！」Iris認為黑手居心叵測，令人憤慨，更怒插對方：「做埋啲損人不利己嘅嘢，不知所謂！」

Monna否認放料

然而，Monna卻否認是放料人，堅稱不認識超盈，她在電話激動地說：「吓？咁奇怪？無啦啦話我？之前我都有聽過佢同超盈鬧交，但我邊有講出去？我唔識超盈，更加冇佢Facebook，好多人都去馬場啦！」Monna坦言跟Iris關係一般，並非朋友：「不嬲關係麻麻哋！平時都係做嘢先見面，好少講嘢，我都唔明點解佢咁多負面新聞，我最多只係話傳我住凱旋門同去馬場！」問到跟Iris和超盈見面會否打招呼和尷尬？她說：「唔尷尬，都會打招呼，我信觀音，對得住天地良心！」