Alan富女友拍拖斷正 驚到黐埋

樂隊Mr.主音布志綸(Alan)於10年捲入與富家女Sally的桃色糾紛,事件平息後,二人的關係亦更進一步!昨日,Alan駕車載Sally到中 環撐枱腳,Sally看見記者後緊張到捉實男友,而Alan則全程護花,Man到爆!

現年32歲的Alan,前年因保護億萬富家女Sally而捲入桃色糾紛,更被控普通襲擊罪,最終達成和解,事後二人感情大躍進,但Alan一直低調保護戀情。

昨午2時許,Alan與Sally步出男方位於薄扶林置富花園的寓所到停車場取車,Alan做「柴可夫」載女友到中環開餐,將座駕停在擺花街後便步往士丹利街歎日本菜。近1小時後,二人步出餐廳,記者上前拍照,身穿間條衫、素顏的Sally即時擰轉面,看來不知所措,更緊張得一度捉實Alan手臂,而Alan則大方向鏡頭笑笑口。

被抄牌懵然不知

問到拍拖多久,Alan說:「我哋食飯啫!(一齊幾耐?)食飯啫!」問到有否結婚打算,他反應極大地說:「梗係唔會啦!」並出言為女友護駕:「唔好影佢啦!我唔介意畀你哋影,但真係唔好影佢!(你哋好襯!)多謝晒!」而Sally則躲在男友身後默不作聲。

折返擺花街取車時,二人驚魂未定,未有發現擋風玻璃上的「牛肉乾」。Alan載女友返回九龍塘,但沒有直接駛到女友寓所門口,然後直駛柴灣接載男友人到銅鑼灣逛街,問到與Sally的感情,他說:「頭先純粹係同朋友食飯啫!多謝大家關心。」記者再致電了解二人關係,他說:「請大家畀多啲空間我啦!(係咪唔否認拍拖?)對!亦冇直認!」

Jeana寸冇好結果

對於Alan拍拖斷正,與他在電影《起勢搖滾》中演情侶的詩雅說:「冇聽佢提過,亦冇見過Sally探班,但好戥佢開心。」同片的Jeana被問會否覺得二人身份懸殊,她抵死地說:「音樂不死,但唔會有好結果,哈哈!講笑啫!Mr.喺討論區好紅,點會身份懸殊啫!快啲娶個Mrs.啦!」

追蹤組

驚青翹實
本與Alan前後腳的Sally,緊張得突然上前捉實男友,方寸大亂。

笑容一致
沿途雞啄唔斷的Alan與Sally,笑容與表情一致,襯到絕!

甜蜜接觸
本來手Fing Fing的Sally,突然忍不住輕觸男友。

心怯彈開
被記者發現後,Sally即時墮後,遠離Alan。

上車速逃
拍拖斷正後,Alan即時與女友上車離開,未有發現擋風玻璃上的「牛肉乾」。

Sally在微博公開與友人慶祝生日及「嗒番杯」的照片,看來人緣不俗。