Rainbow谷行3吋線 胸殺縮水謙

o靚模胡心諾（Rainbow）與羅仲謙昨日在活動「胸」戰，穿貼身低胸背心的Rainbow勁騷3吋事業線，她透露近日飲豆奶瘦身，反觀平日有巨胸謙之稱的謙仔，卻因氣管炎而令巨胸縮水，頓時失色不少！　

胡心諾與羅仲謙昨日一同出席Sinomax床上用品活動，並率領在場200名參賽者大玩枕頭操。穿貼身低胸背心、力谷3吋事業線的Rainbow，實行與同場的巨胸謙鬥胸，可惜謙仔僅以T恤上陣，完全冇睇頭，再加上早前患氣管炎，而沒有勤力做Gym，巨胸因而縮水，故Rainbow可謂不費吹灰之力「Big」走謙仔。

對於谷胸亮相，Rainbow透露服飾由大會提供，雖然在活動上大跳枕頭操，但事前已做足措施，故不擔心被拍到走光照，她說：「我都冇夾嘢！可能之後要拍寫真，呢排節食，又用豆奶當水飲，令身形弗咗啦！（平時都咁性感做運動？）瑜伽同體操都會，落街會加T恤（個胸有冇畀男友當枕頭枕？）冇，胸不嬲唔大，反而鍾意枕男友胸口。」她更表示今次拍寫真仍有性感造型，當中亦有女僕打扮，寄望能與冬甩成員齊齊到三亞或馬來西亞取景。

楊怡冇抽水

至於謙仔則被取笑密實，他即死撐說：「好男不與女鬥，頭先乜都睇唔到，大胸唔係我擇偶要求（鍾意平胸？）鍾意一個人就鍾意全部（以前女友點？）人哋私隱唔好講，正常囉！（楊怡呢？）佢點會講呢啲嘢？（成日抽你水？）冇，如果有人讚都會開心。」