修哥險跌落窿 黎明3抱定驚

胡楓（修哥）80大壽鴻福齊天！前晚修哥在紅館舉行賀壽演唱會時樂極忘形，差點誤墮台上咕窿，幸好逾萬觀眾齊聲喝停他才避過一劫！曾在紅館墮窿的嘉賓林子祥見狀，嚇到鼻哥窿冇肉！

為慶祝80歲大壽，圈中廣結人緣的修哥前晚在紅館舉行演唱會，契仔契女黎明、張家輝、林憶連及好友林子祥、葉蒨文等重量級巨星獻聲助興，3位孫仔孫女亦輪流獻唱，令他整晚笑逐顏開！不過演出險生意外，猶記得林子祥（阿Lam）曾在紅館發生「墮窿事件」，以致耳膜受損，前晚修哥差點重蹈覆轍，嚇得全場抹一把汗！

阿Lam：唔好學我

修哥在演出中又唱又跳，不時大講笑話，整晚處於亢奮狀態，未知是否樂極忘形，當憶蓮準備出場時，台中央的升降台降低，愈講愈興奮的修哥卻沒有察覺危險經已在前面，差一、兩步便跌入大咕窿！千鈞一髮之際，全場逾萬觀眾齊聲大喝叫修哥小心，他才如夢初醒急急停步，今次萬人救了修哥一命，真係險過剃頭！

修哥大步檻過後稍一定神，即高呼：「吉人天相！」然後與憶蓮合唱《夜來香》，當阿Lam行樓梯上台時，嚇到鼻哥窿冇肉的他拿自己開玩笑：「頭先你差啲學咗我，唔好學我啲咁嘅嘢！」修哥即說：「我唔敢學呀！你真係跌落去，我……唔掂o架！好彩觀眾喝住我！」阿Lam笑說：「點解嗰時啲觀眾唔喝住我？下次我開騷，你嚟幫我睇住啲窿。」

葉蒨文壓軸送吻

修哥鴻福齊天，契仔黎明上台後即與他3度擁抱，縱然驚魂未定，但修哥反過來擔心感冒未愈的黎明，而黎明則答應修哥90大壽開騷時會再度支持。至於壓軸登場的葉蒨文，未有與老公阿Lam同台演唱，反為修哥獻唱《紅塵》及送上香吻，在修哥面頰留下香艷唇印。

演唱會順利完成後，修哥笑言狀態良好，還可以唱多幾場，問到可知台上有大咕窿，他說：「真係唔知，好彩聽到觀眾好嘈咁叫，先窒咗冇行，真係吉人天相！」