神獸天使各師各法爭上位

歷年天使系列Sell青春、性感吸引宅男粉絲，今年再有八位神獸天使登陸公仔箱，其中四位天使：騰騰雞（蔡慧欣Gemma）、蛇蛇 gwer（陳芷尤Apple）、嘴刁鵰（劉蔚萱Jenny）及講唔猿（白雲）更是有料之人，而各人都有一套上位辦法。

事業篇

記 ︰之前出產過唔少天使，唔係位位天使都彈起，你哋怕唔怕天使熱潮過咗後冇人記得？

小白 ︰因為依家冇講嘢機會，都怕冇人記得，但世事就係咁，冇得強求，依家一直等緊機會。

Apple ︰反而我就唔擔心，之前都有做過Chok之天使，有啲人記得我，而且我唔會只係做天使，相信會有唔同機會。

Jenny ︰我唔想畀人定型係天使，想靠實力，天使只係畀機會大家認識我哋。

記 ︰擔心做完節目會冇嘢做？

小白 ︰唔多唔少都有，之前做完Chok之天使都擔心會冇嘢做，因為當時都未簽TVB，當然擔心之後條路係點，但我會等待機會，有人起用我做天使已經證明咗有人賞識，亦會珍惜機會。

記 ︰入呢行要由綠葉做起，介唔介意？

Jenny ︰入行個個都話想紅，但唔會一下就可以紅到，乜都要慢慢嚟成為有價值嘅人，我依家就係等緊機會。

辛酸篇

記 ︰遇過乜嘢辛酸事？

小白 ︰最唔慣係要着高踭鞋，仲要着咁耐，隻腳好痛，但為咗做嘢點都捱落去。

Gemma ︰着高踭鞋真係辛苦㗎，有時企得耐好攰。

記 ︰雖然入行唔係好耐，但有冇試過聽到難聽說話或者畀人睇唔起？

Jenny ︰都有，但唔開名喇！之前拍劇做一啲閒角，但有一個重要角色嘅演員就唔滿意服裝部畀我對鞋靚過佢，就話「做咩啲角色仔對爛鞋仲靚過我。」

記 ︰呢啲事有冇打擊自己？

Jenny ︰我唔會諗負面，只會做好每樣嘢！好似之前松哥（劉松仁）都有提點我，佢話就算個角色唔重要都要演好，我相信努力會有人睇到。

Apple ︰其實做任何嘢都預咗會有唔同反應，唔好嘅一定有，好似有人話我做花瓶，我唔會理人點講，加上呢行就係咁，好嘅事冇人會留意，反而壞嘅就會有好多人講。我哋算幸福，都好多人錫同提點，三位主持人會教我哋嘢，而且之前做Chok之天使祥仔（阮兆祥）已經對我哋好好，之後大家都有合作機會，佢都會鼓勵我。

上位篇

記 ︰行性感晒事業線多人留意，你哋會唔會行呢條路爭上位？

小白 ︰如果可以令多啲人認識，而多咗工作機會，我唔介意行性感，因為做天使已經Sell緊性感，而且性感分好多種，湯唯之前嘅演出都好性感，但為藝術咁做我覺得OK。

Apple ︰如果係着泳衣式嘅低胸衫都OK，依家個社會個個對呢啲大興趣嘛！唔會介意行性感。

記 ︰即係唔介意拋胸吸引粉絲？

Jenny ︰我唔會囉！我係想紅，但唔想靠呢啲！我覺得要有人認同你先會紅，其他人先會佩服你，所以我選擇由低捱起！

緋聞篇

記 ︰Gemma早前同金剛傳緋聞，加上身材突出，已經佔咗唔少新聞版位。

Gemma︰哈哈！我唔知點答你，每個人都有自己嘅特色，我對自己身材好滿意，但我唔慣行性感，要我一直性感就一定唔會。

記 ︰同金剛傳緋聞係咪多人識咗？係咪幫到你？

Gemma ︰我真係唔知，冇諗呢樣嘢。

Jenny ︰其實新聞佢一定多，佢都有唔開心，好似佢之前畀人起底啲素顏相，對佢都幾困擾。

記 ︰Gemma同金剛係咪真係撻着？發展成點？

Gemma ︰唔知呀！冇呀！大家係朋友，身邊朋友見到我會講笑，叫我「金剛嫂」，但大家只係合作上嘅朋友，間唔中有WhatsApp，之前大家錄影完返屋企，佢都有問我返到去未。

記 ︰只係WhatsApp你一個？

Gemma ︰唔知呀！我冇理到其他人有冇，我同佢冇嘢o架！總知依家我係單身，亦都唔覺有男士追求，我覺得單身都幾好，而且事業為重，平時有父母同我分享已經足夠。

友情篇

記 ︰八個女仔感情點樣？其實有冇不和或者小圈子？

Gemma ︰我哋感情其實好好，可能大家都係啱啱入行發展，經歷差唔多，所以點會不和呀，仲成日約出去玩同食飯。

記 ︰圈中經常都有爭寵情況，你哋有冇爭寵？

Jenny ︰冇呀，大家成日傻吓傻吓，連監製Wilson（錢國偉）都講笑話我哋不和、爭寵都冇，好奇怪，但呢樣係好事，起碼唔會有是非。

後記：狂擦卻呻肥

女生當然愛靚，四位「神獸天使」小白、Jenny、Apple、和Gemma也不例外，拍攝當日「好肥」及「減肥」這些字總掛在四人口邊，並向小記表示為Keep Fit每日都少吃為妙，但拍攝完成後眾人即拿出一包二包零食開餐，也許瘦就是要付出的。

Jenny

劉蔚萱（嘴刁鵰）

年齡︰23歲

三圍︰33C、22、34

上位度︰★★★

Apple

陳芷尤（蛇蛇 gwer）

年齡︰23歲

三圍︰34C、24、34

上位度︰★★★★

小白

白雲（講唔猿）

年齡︰24歲

三圍︰35E、24、34

上位度︰★★★

Gemma

蔡慧欣（騰騰雞）

年齡︰21歲

三圍︰32D、23、34.5

上位度︰★★★★

金剛棄Gemma揀Apple

與這四位娛樂圈新血相處最長時間就是節目《五覺大戰》主持之一金剛，提到緋聞女友Gemma，他不禁大讚︰「佢傻吓傻吓，好天真好單純。」雖然兩人緋聞傳得熱烘烘，但他似乎對Gemma未有進一步行動，他說︰「自己冇諗咁多，都係做嘢先，大家拎我哋講笑實有，我覺得冇所謂。」

要從四女中挑選一位心水，金剛反而捨Gemma取Apple，他說︰「Apple工作態度好好，佢好聰明啱做呢行。