陳靜儀「鎖」住男友趕絕小三

模媽陳靜儀早前為氹男友開心，特地請教飾物店老闆炮製情侶飾物，她笑言要用親手整的飾物箍實男友，更要男友日夜戴住，宣示其「正印」地位！

今年獨自出寫真的模媽陳靜儀（Mia）最近展開地獄式減肥備戰寫真戰，因經常要節食注意體重而產生壓力，故早前學製作小飾物，藉此減壓之餘，又學多門手藝傍身。日前Mia收起性感，到銅鑼灣飾物店向老闆偷師，自言貪靚的她原來有戴飾物的習慣，平日行街必會買一大堆回家，故不經不覺她已塞滿多個首飾箱。

設計名牌送畀人

當日Mia選擇製作情侶飾物，整了一個心形鎖牌的手繩，另一個是鎖匙手繩，她還急不及待即場試戴，她笑言要用自家製的飾物箍實男友，並要對方日日戴，她說︰「我好少自己整嘢送畀人，通常都係買返嚟，所以今次覺得好有意義，我會叫佢每日都戴，防止其他女仔埋身。」提到男友，Mia分外甜蜜，問到男友知否她來學整飾物？她說︰「佢唔知！因為佢實覺得我整唔到，實會笑我，所以我要證明畀佢睇我係得！」

此外，Mia坦言對自製飾物產生興趣，有意設計Mia牌飾物送給身邊朋友，問到有否打算開飾物店？她說︰「太長遠，未諗過，我呢啲係初級班，唔想獻醜，送畀朋友就得，而且我依家都好忙，開舖都冇時間打理。」