楊汀叮扮傻婆備戰影壇
O靚模始祖Angelababy師妹楊汀叮，龍年首個計劃是學師姐進軍影壇，早前她還專誠向前輩張達明拜師學藝：「張達明教我哋要放開，佢成日要我哋喺好多人面前做好低能嘅動作，例如扮傻婆、趴喺地度碌嚟碌去，等我哋可以釋放自己，唔會好似港姐咁太靜態。」汀叮指將來若拍戲，最希望與古天樂或周潤發合作：「古仔夠靚仔，我未入行前喺港鐵撞見過發哥，當時所有人都好震驚點解發哥會搭港鐵，個個係咁望。但發哥好Nice，全程都笑笑口！」
汀叮又透露私下有與Baby研究演戲，二人都覺得最難應付的是喊戲：「我估係因為我哋性格太正面，唔鍾意喺人哋面前喊。」又指Baby很調皮，常用化了特技妝的照片欺騙她們自己拍戲受傷，令汀叮白擔心一場。
楊汀叮跟張達明學戲時拋開其一貫的斯文形象。
楊汀叮常被師姐Baby整蠱，更因而嚇餐飽！