Monna「峰」靡老外 搭訕邀伴遊

o靚模林宜芝（Monna）日前谷盡「胸」湧事業線，相約日本索模於鬧巿掃街篤魚蛋。篤得興起之際，突然有外籍遊客上前邀兩人同遊，嚇到她們急急腳離開。

有「混血E神」之稱的Monna日前現身銅鑼灣街邊小食檔，穿上低胸衫襯毛毛領大褸的她大拋事業線，站在路邊大啖食，相當矚目！Monna身邊還有一位模特兒身形的索女，兩人邊傾邊篤魚蛋，食得非常滋味，引來不少途人向兩位靚女行注目禮。

避走涼茶舖

正當兩人食得開懷之際，一名年約30多歲、頸掛相機的外籍遊客上前搭訕，嚇得Monna一臉愕然兼面色一沉，但身邊的女伴卻相當有禮貌，不停向對方甜笑兼點頭。未幾，Monna主動拉女伴離開，兩人匆匆走到附近的涼茶舖，隨後有助手前來陪兩人離開。

記者見狀即上前了解發生何事，Monna率先介紹身邊的女伴，原來是日本知名索模梨衣名（Leena），在當地知名度甚高，Monna說：「頭先個遊客問有冇興趣一齊去玩，嚇死我！我真係想鬧佢，乜我哋似援交咩？（個遊客話援交咩？）咁又冇！但感覺唔好囉！」她讚Leena有日本人的好修養，遇到這種事仍能淡定處理，相比之下她自嘲EQ低得多。