陳慧琳6磅半小龍包出世喇!

陳慧琳（Kelly）生咗喇！這位潮媽天后昨日誕下6磅半兒子「小龍包」，母子平安。老公劉建浩全程陪伴入院到剪臍帶，並把最感動一刻拍攝下來。

自09年誕下「蝦餃仔」劉昇後，39歲的Kelly擇定吉時昨日於舊山頂道嘉諾撒醫院誕下6磅半兒子「小龍包」，母子平安。自去年痛失孖女後，Kelly幾經辛苦走出流產傷痛，再接再厲接受人工受孕，勇敢孕育小生命。

今次再得慈姑椗，Kelly舉家開心不已，正值今年是龍年，加上「蝦餃仔」的關係，Kelly一早已為BB取點心系列乳名「小龍包」。昨日順利開刀分娩後，Kelly於下午5時50分於官網公布喜訊，寫道：「小龍包今日（昨日）出世喇！細佬重6磅半，母子平安，遲D（啲）一齊同大家見面啦！」

Alex親手剪臍帶

剛於本周一（19日）還親自接「蝦餃仔」放學的Kelly，昨日在老公劉建浩（Alex）陪同下，秘密到舊山頂道嘉諾撒醫院開刀分娩，入住09年誕下「蝦餃仔」的同一病房及選用同一產房，並由著名婦產科醫生何永超為Kelly操刀，順利誕下「小龍包」。據知「小龍包」的時辰八字與父母及大哥「蝦餃仔」極之相合。

Kelly今次分娩，Alex繼續做緊張大師，除了做「柴可夫」接老婆入院，更親自入產房為「小龍包」剪臍帶，又帶定DV將最珍貴一刻拍下。雖然仍未看出「小龍包」似爹哋或媽咪，但跟「蝦餃仔」擁有同一蝦餃下巴，十分靚仔。

兩公婆爭錫BB

而Alex和Kelly更爭住抱BB錫錫及影相留念，可惜「蝦餃仔」要上學，故沒有第一時間見到細佬。

記者致電恭喜Kelly，她透過經理人公司發言人譚先生說：「我依家精神好好，但啱啱開完刀，麻醉藥未過，所以有啲攰，仲未落到床！」她表示仍未為「小龍包」改名：「因為要改單字，又想個名型啲，所以好難改名！」問會否再追女？Kelly表示BB剛出世，未想到這個問題。Alex這幾天會在醫院留夜，通宵照顧兩母子，絕對是廿四孝老公兼老竇。