陳嘉容盼愛重生

不管人生有幾多個十年，活在當下才最重要！名模陳嘉容（Eunis）經歷過離婚，天橋事業又漸被內地模特兒取代，眼前的她卻是如此從容，更仍然對事業及愛情充滿期待。

記得數年前跟Eunis做訪問，她當時尚未離婚，每當聽到丈夫的名字，總泛起一絲甜笑。07年宣布離婚，對Eunis來說是一場浩劫，幸得家人及朋友鼓勵，令她重新振作。時至今日，Eunis仍期待戀愛，但對擇偶更謹慎，她說：「其實近年都有人追，但好多時唔啱嘴形，細我十年都有，仲細過我細佬呀！可能我思想比較守舊，你五十歲我六十歲喇！你五十歲仲可以搵啲廿三歲，所以我接受唔到！」

笑住面對每件事

Eunis坦言不介意伴侶的國籍及身高：「依家只要有得戀就得，不過鍾意年紀大啲嘅，因為見識多啲，可以教我多啲嘢。一定要有錢過我囉！我唔使養番佢轉頭就得喇！」總是面掛笑容的她，自信單身亦可活得好：「做人每件事都要笑住面對，用正面思想諗，如果一味諗負面嘢就會愈來愈唔開心。」

「戰友」退下火線

十年前是Eunis天橋事業發光發亮的年代，當年同期有周汶錡、馬詩慧及李嘉慧等身材高挑、走上天橋甚具台型的名模，如今她們退下火線，取而代之的是國產模。Eunis接受這個改變，兩年前她為內地企業公司擔任儀態導師，她說：「現代女性除咗思想、學識要得，樣同身材又要得，好辛苦o架！不過要記住，你學嘅嘢係為自己做，唔係為男友或老公。」

後記 可愛女人

別以為年輕女子才愛自拍，年屆36歲的Eunis甫到這間洋溢歐陸風情的Cafe，亦不停自拍，更自認「港女」！她打趣地說：「梗係趁仲有青春留倩影啦！每個女仔都要有一個紀念！」