蕊蕊打碟「峰」靡酒客：要識保護自己

樂壇新人蕊蕊（前名陳蕊蕊）日前返內地登台搵人仔，穿低胸裝的她不時俯身捽碟，4吋事業線令酒客神魂顛倒！蕊蕊為免遭抽水，出場前以大褸包到冚：「最緊要識保護自己。」

憑電視節目《耳分天下》的「柑桔天使」殺入娛樂圈的蕊蕊，近日轉戰歌壇。她日前偕老闆漢洋到內地酒吧登台，Fit到爆的蕊蕊以低胸裝示人，獻唱時不斷扭屁股，吸引不少酒客上前拍照，又走到DJ台俯身露出4吋事業線捽碟，期間有酒客企圖伸手「抽水」，即被保安推開。

蕊蕊坦言低胸裝已是極限：「衣着上唔會太Over，吊帶背心已經夠，一定唔會着比堅尼，低胸裝已經係底線，着得太少好危險。（擔心畀人抽水？）行入會場一直用大褸包住自己，直至上台一刻先會除褸，最緊要識保護自己。（可以衝上台抽水？）有公司同事同十幾個保安維持秩序，根本衝唔到上嚟。」

試過畀人摸Pat

問到有否學防狼術？蕊蕊說：「有學泰拳，但相信唔會防到狼，因為對方有心要抽水，點都會中招。（有冇試過被抽水？）有，當年做天使時畀人摸Pat Pat。（蝕底？）冇辦法，有出聲o架！但當時太多人同混亂，根本都唔知咩人出手。」