William揸百萬戰車行蠱惑

愛車之人陳偉霆豬籠入水，最近豪擲逾百萬元買下Benz新款四驅車，日前他駕駛戰車會合詩雅拜會前輩陳惠敏，為英皇新片《紮職》取經，獲途人大讚與新車同樣有型！

英皇藝人陳偉霆（William）近年事業發展不俗，先後擔正多套電影主角，包括已開拍的英皇新片《紮職》。吸金力強加上性格慳儉，他最近終儲夠彈藥，購買逾百萬元的全黑BenzG350新款四驅車，進身百萬車主！

搭膊頭大讚

日前他駕駛落地剛1個月的新車現身觀塘，雖然戴上黑超，但仍被途人認出，有女學生大叫：「William好靚仔！」更有男途人主動上前打招呼，並大讚他的新車有型有款，令他笑逐顏開！

其後，William會合同公司的詩雅、經理人及《紮職》導演到茶餐廳密斟，同場還有以飾演江湖人士聞名的前輩陳惠敏，觀乎人腳，他與詩雅似乎是為新片向前輩取經。雖然飯敍只有短短半小時，但陳惠敏不時指天篤地講古仔，而William與詩雅則留心細聽，離開餐廳時，陳惠敏更搭着William膊頭大表讚許。

事後，William直認拜會陳惠敏為新片取經：「我喺戲入面做食腦嘅蠱惑仔，惠敏哥主要係教我平時講嘢嘅語氣同手勢。」談及其逾百萬元新車，他坦言肉赤：「初出道嗰陣好想有跑車，但呢幾年人大咗，換一架既有型而屋企人又坐得舒服嘅車。」