基仔冧「女友」講心

歌手古巨基昨日舉行「古巨基Amazing World Live 2011」簽唱會，他笑言白色情人節不需要回禮給緋聞女友Lorraine，並尷尬地表示不追求建立在物質上的戀愛。

古巨基（基仔）昨日戴帽出席簽唱會，獲大批歌迷支持，問到白色情人節（3月14日）如何回禮給緋聞女友Lorraine，基仔說：「其實我唔係好識禮節嘅嘢，同埋情人節都冇人同我表白，所以白色情人節咪唔使回禮囉！（係咪兩人關係已老夫老妻，所以唔使回禮？）又唔係嘅，唔會追求物質上嘅嘢。（即係追求心靈上？）」基仔即時口啞啞並停頓片刻：「咩呀？」尷尬萬分的他不知如何應對，被記者取笑語塞時，他即笑笑口說：「係呀！我乜都聽唔到，直頭係耳塞加語塞呀！」

大騷畫功

而為與歌迷提前慶祝白色情人節，基仔除送上至冧情歌外，更與他們大玩甜蜜遊戲。歌迷以「Amazing Love」為題畫了一隻鑽石戒指，基仔取笑歌迷畫的戒指像「Pat Pat」，隨即親自畫上幾筆，搞笑地畫出Q版「便便」，全場大笑！基仔現正籌備錄製下一張廣東大碟，預計暑假推出，並將為亞洲音樂節擔任表演嘉賓，還拍了三個廣告，其中一個廣告更由他親自執導。