大牌Carol三宗罪 隨時入雪櫃

「浸大E神」楊梓瑤（Carol）日前在活動上揚言「搵唔啱經理人」，令模特兒公司震怒！據知近半年來，她犯下遲到、揀Job及冇禮貌3宗罪，早已令公司不滿，加上今次口出狂言，被急召照肺，更隨時入雪櫃！

前年憑E Cup上圍彈出的Carol，成名後拒再玩寫真戰，轉戰大銀幕並誓言收起「E咪咪」，故近半年工作寥寥可數。甚少蒲頭的她，日前在公開活動上竟自爆有意退出模界，更揚言「搵唔啱經理人」，一手捧紅她的模特兒公司有感有人「過橋抽板」，大為震怒！

彈三彈四拒性感

據知，今番言論只是導火線，實情是Carol人紅態度囂，近半年更犯下3宗罪，包括耍大牌揀工作、遲到及唔睬同事！據知，她幾乎每次工作都例遲近1小時，而且情況愈見嚴重，如月前一個拍攝工作，她比原定時間遲了個多小時才現身，懶理工作人員三催四請，以致連累全場呆等，拖慢拍攝進度！

其次是公司每次為她接工作，她都諸多藉口，除以讀書為由拒絕外，又指每樣工作都利少弊多，要性感上陣就更加耍手擰頭，令公司大為不滿。而她與同事亦相處得極不融洽，每次回公司都不瞅不睬，不與同事打招呼，完全欠溝通。

急召返公司照肺

記者昨日致電其公司的發言人，提到Carol的3宗罪，他未有否認︰「大家確實出現不少問題，相處唔算融洽，反而同公司嘅周柏豪返嚟都會跟同事打招呼。」對於Carol揚言沒有合適經理人，他說︰「合約寫明佢係公司嘅全職模特兒，佢讀書，當然大家會就時間。公司事前唔知佢會咁講，確實震驚。（踢佢入雪櫃？）之後會搵佢傾，雪藏係最後嘅選擇！」明顯向她發出最後通諜，而Carol則至截稿前未有回應。