麥浚龍一分鐘摧毀桃花

麥浚龍（Juno）昨日與混血女模Asha同場出席活動，拘謹得全程翹手擺甫士，反而Asha主動搭膊；Juno直言只與對方相處了一分鐘，而且今年以事業為重，感情生活歸「零」。

歌手麥浚龍昨日以型格打扮出席運動用品發布會，同場有混血女模Asha，Juno與她合照時顯得腼腆拘謹，只肯翹手擺型仔甫士，反觀Asha十分熱情，主動搭Juno膊頭。

由於Asha與Juno的前度女友戴庚玲同屬混血模特兒，問到Asha是否他「那杯茶」？Juno笑說：「頭先Briefing都冇一分鐘，樣都未睇得清楚呀！（感情生活如何？）依家係『零』，今年我要做事業型！媽咪都冇催我，要催都催阿哥先啦！」

升呢執導演筒

今年入行十周年的Juno滿肚密圈，打算「升呢」做導演，年中會開拍一部驚慄題材的電影，目前仍在進行選角，問到導演價是否很貴？他笑說：「我係新人價咋！（自己投資？）搵外面投資，但自己搞製作。」此外，現場播放Juno為品牌拍攝的宣傳片，他表示因拍攝時喪跳十多個小時，令氣管炎發作及喉嚨縮窄，要服用哮喘藥，惟他強調本身並無哮喘。