Jeana：得比失多一千萬倍

何佩瑜（Jeana）入行就想擁有一個美麗的身體，因而決心整容，聽落膚淺，但很實際，因為的確對事業有幫助，Jeana說：「做完醫學美容後得到嘅，絕對比失去嘅多一千萬倍。」

我不嬲都貪靚，一直都想靚啲，畀人睇落感覺Charm（魅力）啲，所以整唔整一直都心大心細。直到自己成為新八模，以為可以以高取勝，點知原來唔Work，我依然係八個女仔入面，最唔起眼一個。唔單只有個周秀娜阻住，前面仲有7個女仔騎住我，真係心有不甘。

豐滿啲！豐滿啲！豐滿啲！我知道要好似周秀娜身材咁正先吸引人注意。我上年出個人寫真，就開始着手搵呢方面資料，唔想貿貿然去整容。So Far，最後出嚟效果真係好靚，唔單只我滿意，連身邊嘅人都覺得好自然。

有朝一日拆彈

我做呢個療程都有一段日子，當中嘅感受又驚又喜，喜當然係個樣同身形令我滿意啦！驚係唔知其他人會唔會接受我做醫學美容。不過，驚嘅感覺好快一掃而空，依家如果你唔提我，我仲以為個胸係渾然天成。唔係咩？如果大家唔識得我，或我一出道就係咁嘅樣同身材，會唔會有人懷疑我呢？我相信冇囉！所以我覺得做完醫學美容後得到嘅，絕對比失去嘅多一千萬倍。

有人咒我老咗個樣會塌，我啋！將來嘅事將來先知，今日我走去美胸，亦難保唔會有朝一日拆彈，天曉得；亦有人問過我如果男朋友唔鍾意會點？呢句更加係廢話，呢一刻我公開講畀大家知我做過美胸，往後同我拍拖嘅男仔都應知道呢件事，佢同得我一齊，又點會介意呢？（明日待續）

口述：何佩瑜　筆錄：專案組