Baby踩曼玉場騰騰震

巴黎時裝周潮人明星雲集，升呢的Angelababy首度獲多個品牌邀請遠赴當地參加時裝騷，現場歡呼聲四起，更有「街拍大師」追着她拍照，Baby還有幸跟影后張曼玉同場睇騷，十分威水，不過卻搞到騰騰震！

剛度過23歲生日的Angelababy，急急趕赴法國參加2012巴黎時裝周，她於巴黎時間本月二日下午二時半偕經理人Kim現身Dior時裝騷，穿上白襯衫、黑皮裙配襯特殊質料皮草，帥氣十足，不過冷得騰騰震。雖然首度踩場，但Baby的聲勢絕不遜於其他女藝人，攝影師爭相拍照，現場更有不少人大叫「Baby」，認真巴閉！

剛落機的Baby表示不感到疲累，她說：「好開心見到好多靚人，今次主要嚟睇騷同玩吓，我都有同朋友同媽咪一齊嚟巴黎。」她自爆自掏腰包請媽媽過來，順道旅遊，問到男友黃曉明有否同行？她甜笑說：「當然冇！（有冇試過兩家人一齊去旅行？）冇！（二人世界呢？）工作要緊。（男友會唔會擔心你有艷遇？）巴黎唔會啦！」她又稱將會瘋狂購物獎勵自己。

騷後Baby急趕往另一場騷，期間被攝影師重重包圍，更有國際「街拍大師」Bill Cunningham提出要拍她的照片，親民的她一一滿足對方要求，卻害得自己要飛奔趕下場，難得她還幽自己一默：「在巴黎奔跑還挺浪漫的！」

影后滿場飛吹水

當地時間晚上八時半，Baby與影后張曼玉（Maggie）一同現身Lanvin時裝騷，時裝周常客Maggie心情大好滿場飛，非常風騷，不時與友人談笑風生，問到可否接受訪問？她友善地說：「唔好意思，我唔會答嘢！」今年剛好是設計師Alber Elbaz入主品牌十周年，一班模特兒謝幕時，設計師特別站在台上獻唱，以答謝時裝迷多年的支持！